पासपोर्ट फालेर नेपालमा बस्दै आएका अमेरिकी पक्राउ
<p>काठमाडौं। नेपालीहरू अवैध माध्यमबाट अमेरिका प्रवेशपछि पासपोर्ट फालेर शरणार्थीका रूपमा बस्न खोज्ने प्रवृत्ति नयाँ होइन।</p>
<p>मेक्सिकोको सीमाबाट त्यसरी अवैध रूपमा छिरेर अमेरिका गएर लुक्ने नेपालीको संख्या ठूलो छ।</p>
<p>नेपाली अमेरिका गएर लुक्ने मात्र होइन, कतिपय अमेरिकीसमेत लुकिछिपी नेपालमा बस्ने गरेको पाइएको छ ।</p>
<p>पासपोर्ट फालेर यसरी नेपालमा बस्दै आएका एक अमेरिकी नागरिक ६ माघमा काठमाडौंमा पक्राउ परेका छन्।</p>
<p>गाँजा खाएर होहल्ला गरेको अवस्थामा अमेरिकी नागरिक हेनी योङलाई पर्यटक प्रहरीले पक्राउ गरेर अध्यागमन विभागमा बुझाएको छ।</p>
<p>उनी अवैध रूपमा नेपालमा बस्दै आएको र पासपोर्टसमेत नभेटिएको अध्यागमन विभागका अधिकृत वैकुण्ठ रेग्मीले बताए।</p>
<p>यसरी नेपालमा अवैध रूपमा लामो समय बस्ने उनी एक्ला अमेरिकी होइनन्।</p>
<p>सन् २०१९ मा नेपालमा भिसाको अवधि सकिएर अवैध रूपमा बस्दै आएका २३ जना अमेरिकी नागरिकलाई सरकारले निष्कासन गरेको छ।</p>
<p>एक वर्षमा नेपालमा पर्यटकहरूले १५० दिन बस्न पाउँछन् । अमेरिकासँग भिसा पारस्पारिकताका आधारमा १८० दिनसम्म बस्न पाउँछन् ।</p>
<p>त्योभन्दा लामो अवधि बसेकालाई मात्र अध्यागमन विभागले जरिवाना गरेर निष्कासन गर्छ।</p>
<p>"अमेरिकीहरू प्रायः लागुऔषध, बाल यौन दुराचार मुद्दामा नेपालमा पक्राउ पर्छन्,"अध्यागमन विभागका महानिर्देशक ईश्वरराज पौडेल भन्छन्, "कतिपय अपराध गरेर लुक्न आएकालाई पनि हामीले पक्राउ गरेर फिर्ता गरेका छौँ।"</p>
<p>अमेरिकामा बाल यौन दुराचार गरेर लुक्न नेपाल आएका एक अमेरिकीलाई लैजान अमेरिकी सरकारले प्लेन नै चार्टर्डसमेत गरेको थियो ।</p>
<p>सन् २०१९ मा नेपालबाट निष्कासित हुने विदेशीमा तेस्रो स्थानमा अमेरिकी रहेको आजको नयाँ पत्रिकामा समाचार छ।</p>
<p>पहिलो स्थानमा चिनियाँ र दोस्रो स्थानमा इरानी भएको अध्यागमन विभागले जनाएको छ।</p>
<p>नेपालमा बसेर कानुन मिच्ने विदेशी नागरिकमाथि कारबाही बढाइएको विभागका महानिर्देशक पौडेलले बताए।</p>
<p>"विकसित देशका नागरिकसमेत नेपालमा वर्षौँदेखि अवैध रूपमा बस्दै आएको पाइयो," उनी भन्छन्, "त्यस्ता विदेशीमाथि हामीले निगरानी बढाएका छौँ ।"</p>
प्रतिक्रिया दिनुहोस्
.jpg)
