धादिङमा ट्रक दुर्घटना: मृतकको संख्या सात पुग्यो (अपडेट)
<p>काठमाडौं। धादिङमा यात्रु बोकेको एउटा ट्रक दुर्घटना हुँदा सात जनाको मृत्यु भएको छ। ३२ जना घाइते भएका छन्।</p>
<p>घाइतेमध्ये १५ जनालाई काठमाडौं रेफर गरिएको छ। ११ जनालाई नेपाली सेनाको हेलिकोप्ट र चार जनालाई एम्बुलेन्समार्फत् काठमाडौं पठाइएको जिल्ला प्रहरी कार्यालय धादिङका प्रहरी उपरीक्षक (एसपी) रवीन्द्र रेग्मीले जानकारी दिए । अन्य घाइतेको जिल्ला अस्पताल धादिङमै उपचार भइरहेको छ। </p>
<p>आज दिउँसो ४ बजेतिर मिनिट्रक सडकमै पल्टिँदा चार जनाको घटनास्थलमै र तीन जनाको धादिङ अस्पतालमा उपचारका क्रममा मृत्यृ भएको एसपी रेग्मीले बताए। मृत्यु हुनेहरूमा निलकण्ठ–२ भुलभुलेका बिदुर गुरुङ, ध्वजबहादुर गुरुङ, तिलक गुरुङ, पुर्णमान श्रेष्ठ, प्रेम गुरुङ, बेलबहादुर गुरुङ र सेते गुरुङ रहेका छन् । दुर्घटनापछि भुलभुले शोकाकुल बनेको छ। </p>
<p>धादिङको ज्वालामुखी गाउँपालिका–४ मा रहेको ढोला मण्डलीमाईको दर्शन गरेर फर्किएका दर्शनार्थी चढेको ग १ ख ८०१२ नम्बरको मिनी ट्रक दुर्घटना भएको हो। मिनी ट्रकमा ढोला मण्डलीमाईको दर्शन गर्न गएका निलकण्ठ नगरपालिका–२ भुलभुलेका बासिन्दा चढेको प्रहरीले बताएको छ।</p>
<p>तीब्र गतिका कारण दुर्घटना भएको प्रहरीले प्रारम्भिक अनुमान गरेको छ । हरेक साताको मंगलबार ढोलामण्डलीमा पाठी भाकल पूजा हुने गरेको स्थानीयको भनाइ छ । पूजा गर्न भन्दै प्रत्येक हप्ता सयौं दर्शनार्थी ढोलामण्डली जाने गर्दछन् । </p>
प्रतिक्रिया दिनुहोस्
.jpg)
