अर्थतन्त्र सुधारात्मक अवस्थामा छ: अर्थमन्त्री
<p>काठमाडौं । अर्थमन्त्री डा. युवराज खतिवडाले देशको अर्थतन्त्र ओरालो लाग्यो भनेर तर्सिनु नपर्ने बताएका छन्।</p>
<p>कृषि विकास बैंकको ५३औं वार्षिक साधारणसभामा बोल्दै अर्थमन्त्री खतिवडाले अर्थतन्त्र सुधारात्मक अवस्थामा रहेको बताएका हुन्।</p>
<p>उनले भने, “अर्थतन्त्रको काम नै उकाली र ओराली गर्ने हो। थोरै उकालो लाग्दा स्वाँ स्वाँ गर्ने र ओरालो झर्दा आत्ति हाल्ने अवस्था छैन।”</p>
<p>विगतमा द्ई प्रतिशत आर्थिक वृद्धि हुँदै आएकोमा अहिले त्यो छ प्रतिशतभन्दा तल कुरै हुन छाडेको उनको तर्क छ।</p>
<p>अर्थतन्त्र सकारात्मक अवस्थामा रहेको सरकारी तथ्यांकको विश्वास नलागे अन्तर्राष्ट्रिय तथ्यांक हेर्न अर्थमन्त्रीले सुझाव दिए।</p>
<p>केही दिनअघि अन्तर्राष्ट्रिय मुद्रा कोष (आईएमएफ) ले नै नेपालको यस वर्षको आर्थिक वृद्धिदर ६ प्रतिशत रहेको तथ्यांक सार्वजनिक गरेको थियो।</p>
<p>कुनै समय नेपालको व्यापार घाटा बढेको बढ्यै भन्ने समाचार आउने गरेकोमा अहिले निर्यात बढेको र आयात घटेको समाचारहरु प्रकाशन हुन लागेकोमा अर्थमन्त्रीले खुसी व्यक्त गरे।</p>
<p> </p>
प्रतिक्रिया दिनुहोस्
.jpg)
