एनभीए कपः हेल्प नेपाल क्वार्टरफाइनलमा
<p>काठमाडौं। हेल्प नेपाल स्पोर्टस् क्लबले आज बुद्धटोल युवा क्लबलाई ३–० को सोझो सेटमा हराउँदै एनभीए राष्ट्रिय क्लब महिला तथा पुरुष भलिबल च्याम्पियनसिपको अन्तिम आठमा स्थान बनाएको छ।</p>
<p>त्रिपुरेश्वरस्थित राष्ट्रिय खेलकुद परिषद् (राखेप) को कभर्ड हलमा हेल्प नेपालले बुद्धटोल युवा क्लबलाई २५–१०, २५–१५, २५–११ को सेटमा हराएका हाे।</p>
<p>जितसँगै हेल्प नेपाल पुरुषतर्फ समूह ‘डी’ विजेता बन्दै अन्तिम आठमा स्थान बनाएको छ। प्रतियोगिताको चार समूहबाट विजेता र उपविजेताले अन्तिम आठमा स्थान बनाउनेछन्। समूह ‘डी’ मा दुई टोली मात्र छन्।</p>
<p>त्यसका कारण हेल्प नेपाल विजेता बन्दै अन्तिम आठमा स्थान बनाउँदा बुद्धटोल युवा भलिबल उपविजेता बन्दै अन्तिम आठमा स्थान बनाउन सफल भयो।</p>
<p>यसअघि समूह ‘सी’बाट नेपाल पुलिस क्लब र मणिमुकुन्द भलिबल क्लबले पनि अन्तिम आठमा स्थान सुरक्षित गरिसकेका छन्। समूह ‘सी’ मा रहेको अर्को क्लब पार्वती भलिबल क्लबले अन्तिम समयमा सहभागी नभएपछि पुलिस क्लब र मणिमुकुन्दले अन्तिम आठमा स्थान बनाएका हुन्। तथापि समूह ‘सी’ विजेता र उपविजेताको टुंगो भने लागेको छैन।</p>
<p>आजै महिलातर्फ एपीएफले भरतपुर मेट्रो खेलकुद परिषद‍्विरुद्ध खेल्नेछ भने त्रिभुवन आर्मी क्लबले जावलाखेल भलिबल तालिम केन्द्रविरुद्ध खेल्नेछ। </p>
प्रतिक्रिया दिनुहोस्
.jpg)
