महीनावारी हुँदा घरको बाटो हिँडेको भन्दै कुटिए दुई महिला
<p>कंचनपुर। सरकारले महिला हिंसा र कुसंस्कार अन्त्य गर्न कर्णाली र सुदूरपश्चिमका गाउँ-गाउँमा छाउगोठ भत्काउँदै हिँडेको छ।</p>
<p>तर, सुदूरपश्चिमकै कञ्चनपुरमा महीनावारी हुँदा आफ्नो घरको बाटो हिँडेको भन्दै एक पुरुषले दुई महिलालाई निर्घात कुटेका छन्।</p>
<p>बेलडाँडी गाउँपालिका–१ टाइगर बस्तीका दलबहादुर शाहले शुक्रबार छिमेकी गीता खड्का र ईश्वरी खड्कामाथि हातपात गरेका हुन्। महीनावारीका वेला घरको बाटो हिँड्दा 'आँखा लागेर भैँसीले दूध नदिएको' आरोप लगाउँदै शाहले कुटेको पीडितहरूले बताएका छन्। गीता र ईश्वरी देउरानी–जेठानी हुन्।</p>
<p>"मिन्स भएको वेला मेरो घरको बाटो किन हिँडेको भन्दै देउरानीलाई दलबहादुरले गाली गर्‍यो," धनगढीको नोभा अस्पतालमा उपचाररत ईश्वरीले भनिन्, "मैले तथानाम नबोल्नुस् भनेपछि हामी दिदी–बहिनीलाई नै कुटपिट गर्‍यो।"</p>
<p>गीताको पनि नोभा अस्पतालमै उपचार भइरहेको छ। खड्का परिवार आरक्षपीडित भएकाले शाह परिवारकै जमिनमा बस्दै आएको छ। दुवै परिवारको सधैँ हिँड्ने बाटो नै एउटै छ।</p>
<p>तर, त्यही बाटो प्रयोग गर्दा आफ्नो घरको बाटो हिँडेको आरोप लगाएर दलबहादुरले कुटपिट गरेका हुन्।</p>
<p>दलबहादुरलाई प्रहरीले नियन्त्रणमा लिएको छ। घटनाको अनुसन्धान भइरहेको इलाका प्रहरी कार्यालय बेलडाँडीले जनाएको छ।</p>
<p>छिमेकी, स्थानीय र महिला अधिकारकर्मीले घटनाको छानबिन गरी दोषीमाथि कारबाहीको माग गरेको आजको नयाँ पत्रिका दैनिकले समाचार लेखेको छ।</p>
<p>‘सरकारले छाउपडी उन्मूलनका लागि देशव्यापी अभियान चलाएको छ, तर बेलडाँडीको घटनाले त्यो अभियानमाथि नै प्रहार गरेको छ,’ अधिकारकर्मी माया नेगीले भनिन्।</p>
<p>दोषीलाई उन्मुक्ति दिन चलखेल गरे आन्दोलन गर्ने महिला अधिकारकर्मीले चेतावनीसमेत दिएका छन्।</p>
प्रतिक्रिया दिनुहोस्
.jpg)
