धनगढी विमानस्थलको मर्मत नसकिँदा हवाई सेवा प्रभावित
<p>कैलाली। धनगढी विमानस्थलको धावनमार्ग मर्मतको काम नसकिदा हवाई सेवा आंशिक रुपमा प्रभावित भएको छ।</p>
<p>निर्माण कम्पनीले धावनमार्ग निर्माणका नाममा ३ बजेपछिको उडान बन्द गराएपनि निर्माण कार्य भने जारी नराखेको हवाई कम्पनीहरुको आरोप छ।</p>
<p>काठमाडौंबाट बुद्ध एयर र श्री एयरलाईन्सले धनगढीमा दैनिक दुई/दुई वटा उडान भर्दै आएका थिए। </p>
<p>निर्माण कम्पनीले विमानस्थल आंशिक बन्द गरेपछि बुद्ध एयरले दैनिक एउटा मात्रै उडान गर्दै आएको छ। श्री एयरलाईन्सले भने साँझको उडान तालिकालाई अघि सारेको छ।</p>
<p>उडान कटौतीसँगै धनगढी- काठमाण्डौं-धनगढीका यात्रुहरुले चर्को हवाई भाडा तिर्नुपरिहेको गुनासो गरेका छन्।</p>
<p>बुद्ध एयर धनगढीका इन्चार्ज बुधराम माझीले उडान संख्या कम भएपछि सिटसंख्या घटेको तर यात्रुको चापका कारण भाडा बढेको बताए।</p>
<p>दैनिक चार वटा उडान हुँदा यात्रुहरुले चार हजार २०० रुपैयाँसम्ममा धनगढी-काठमाण्डौं यात्रा गर्थे।</p>
<p>उडानसंख्या कम भएपछि एयरलाईन्सहरुले सस्तो दरको टिकट हटाएका छन्।</p>
<p>लुम्बिनी, कोशी, एण्ड न्यौपाने, खड्का, कृष्ण जेभीले धनगढी विमानस्थल मर्मत तथा निर्माणको ठेक्का आउँदो ३० फागुनसम्म सक्ने गरी सम्झौता गरेको छ। </p>
<p>२० करोड रुपैयाँ लागत रहेको विमानस्थल मर्मत अन्तर्गत एक हजार ८०० मिटर लामो धावनमार्ग चार मिटर थप चौडा गरिनेछ ।</p>
<p>हाल ३० मिटर चौडाई रहेको धावनमार्गको दुबैतिर दुई /दुई मिटर सोल्जर निर्माण गरिनेछ । त्यस्तै ट्याक्सी मार्ग र एप्रोन निर्माण गरिनेछ।</p>
<p>ठेकेदार कम्पनीका ईञ्जिनियर योगेन्द्र शर्माले हालसम्म ८० प्रतिशत निर्माण कार्य पुरा भएको जानकारी दिए।</p>
<p>चिसो र वर्षाका कारण निर्माणको लागि पर्याप्त समय दिन नसकेको शर्माले बताए।</p>
<p>प्राविधिकका अनुसार १५ डिग्रिबाट भन्दा कम तापक्रममा कालोपत्रे गर्दा निर्माण गुणस्तर हुँदैन। </p>
<p> </p>
प्रतिक्रिया दिनुहोस्
.jpg)
