चार विद्यार्थी पढाउन पाँच जना शिक्षक
<p>सिरहा। सिरहा नगरपालिका–९ गुलरियास्थित आधारभूत विद्यालयमा पाँच शिक्षकको दरबन्दी छ।</p>
<p>तर, ती शिक्षकले पढाउने विद्यार्थी भने चारजना मात्रै छन्। सदरमुकामदेखि तीन किलोमिटर दूरीमा रहेको यो विद्यालयमा ४५ विद्यार्थी भर्ना भएको रेकर्ड छ।</p>
<p>कक्षा एकमा १२, दुईमा ६, तीनमा पाँच, चारमा ११ र पाँचमा ११ विद्यार्थी भर्ना भएका छन्। तर, प्रधानाध्यापक र शिक्षक नियमित विद्यालय आउन छाडेपछि विद्यार्थीको उपस्थिति पनि घटेको हो।</p>
<p>आजभोलि विद्यालयका कक्षाकोठामा अधिकांश समय ताला झुन्डिएको हुन्छ ।</p>
<p>२४ पुसमा कुनै सार्वजनिक बिदा थिएन, तर विद्यालयका सबै कक्षाकोठामा ताला लागेको थियो ।</p>
<p>विद्यालयछेवैमा रहेको दैवसुनैर ठाकुरको घरअगाडि चार विद्यार्थी पढाउँदै थिइन् शिक्षिका सावित्रा शर्मा।</p>
<p>शर्माले कक्षा तीनका एक र पाँचका तीन विद्यार्थी एकैठाउँमा राखेर पढाउँदै थिइन्। कक्षाकोठामा ताला लागेकाले अरूको घरमा ल्याएर पढाउनुपरेको शिक्षिका शर्माले बताइन्।</p>
<p>विद्यालयका प्रधानाध्यापक हुन्, श्याम यादव। उनी नआउँदा कक्षाकोठाका ताला खुल्दैनन्।</p>
<p>कर्मचारी नभएका कारण प्रअले नै साँचो बोक्ने गरेको शिक्षिका शर्माको भनाइ उद्धृत गर्दै आजको नयाँ पत्रिकामा समाचार लेखेको छ।</p>
प्रतिक्रिया दिनुहोस्
.jpg)
