पर्यटन बोर्डबाट एक करोड लिएर विदेशी फरार
<p>काठमाडौं। नेपालको पर्यटन प्रचार गर्ने भन्दै पर्यटन बोर्डबाट एक लाख अमेरिकी डलर (एक करोड १३ लाख रुपैयाँ) लिएर एक विदेशी फरार भएका छन्।</p>
<p>विश्वका चर्चित कलाकारलाई नेपाल घुमाएर प्रचार गर्ने भन्दै रकम बुझेपछि जर्मन नागरिक माइकल कोबाल्ड सम्पर्कबीहीन भएका हुन् ।</p>
<p>उनले अमेरिकाबाट पुराना दमकल ल्याएर हिमाली जिल्ला पुर्‍याएर नयाँ शैलीमा प्रचार गर्ने कार्यक्रममा सम्झौता गरेका थिए।</p>
<p>‘नेपाल फायर ट्रक एक्सपिडिसन’ नामक उनको कार्यक्रमका लागि बोर्डले दुई लाख डलरमा सम्झौता गरेर एक लाख डलर शुरुमै दिएको थियो।</p>
<p>सार्वजनिक खरिद ऐनअनुसार विनाप्रतिस्पर्धा यसरी सम्झौता गर्न मात्र होइन, शुरुमै आधा भुक्तानी गर्नसमेत मिल्दैन ।</p>
<p>घटनाको अख्तियार दुरुपयोग अनुसन्धान आयोगले छानबिन थालेको छ । माइकलसँगै बोर्डका पूर्वप्रमुख कार्यकारी अधिकृत दीपकराज जोशीलगायतविरुद्ध उजुरी परेपछि आयोगले छानबिन थालेको हो।</p>
<p>प्रारम्भिक छानबिनमै गम्भीर त्रुटि भेटिएपछि विस्तृत छानबिन थालिएको अख्तियारका एक अधिकारीले बताए ।</p>
<p>आजको नयाँ पत्रिका दैनिको समाचार अनुसार अख्तियारले विदेशी नागरिकलाई भुक्तानी दिन प्रयोग भएका कागजपत्र बोर्डबाट जफत गरिसकेको छ।</p>
<p>एक वर्षभित्र सो कार्यक्रम गर्ने भन्दै उनले सन् २०१७ मै भुक्तानी लिएका थिए। बोर्डका पूर्वसिइओ जोशीले भने कानूनअनुसार नै सम्झौता भएको र काम नगरेपछि बाँकी भुक्तानी नदिएको बताए।</p>
<p>आफू पुनः बोर्डको सिइओको प्रतिस्पर्धामा रहेकाले यो विषयलाई अख्तियारमार्फत उचाल्न खोजिएको उनको आरोप छ।</p>
प्रतिक्रिया दिनुहोस्
.jpg)
