मनमोहन मेमोरियल कपः पुलिस सेमिफाइनलमा
<p>काठमाडौं। दीपेन्द्रसिंह ऐरीको अलराउन्ड प्रदर्शनप्रेरित नेपाल पुलिस क्लबले आज प्रदेश २ लाई ४६ रनले हराउँदै मनमोहन मेमोरियल एकदिवसीय राष्ट्रिय प्रतियोगिताको सेमिफाइनलमा स्थान बनाएको छ।</p>
<p>दीपेन्द्रसिंह ऐरीले अर्धशतक बनाएपछि सुनसरीको इनरूवा क्रिकेट मैदानमा टस हारेर ब्याटिङका लागि निम्त्याइएको नेपाल पुलिस क्लबले ४८.१ ओभरमा सबै विकेट गुमाएर १८३ रन बनाएको थियो।</p>
<p>दीपेन्द्रसिंहले बलिङतर्फ पनि तीन विकेटको योगदान गरेपछि १८४ रनको लक्ष्य पछ्याएको प्रदेश २ ले ४२.२ ओभरमा सबै विकेट गुमाएर १३७ रन मात्र बनाउन सक्यो।</p>
<p>जितसँगै पुलिस क्लब समूह ‘बी’ बाट विजेता बन्दै अन्तिम चारमा प्रवेश गरेको हो। यसअघि प्रदेश ३ र त्रिभुवन आर्मी क्लबले पनि अन्तिम चारमा स्थान बनाइसकेका छन्।</p>
<p>१८४ रनको लक्ष्य पछ्याउने क्रममा प्रदेश २ का लागि विशाल सुस्लिङले सबभन्दा धेरै ८० रन बनाए। विशालले ११२ बलमा आठ चौका र पाँच छक्का प्रहार गरे। हरिशंकर शाहले १८ तथा हसिम अन्सारीले १० रन बनाउनु बाहेक प्रदेश २ का अन्य ब्याट्सम्यानले दोहोरो अंकमा रन बनाउन सकेनन्।</p>
<p>पुलिस क्लबका दीपेन्द्रसिंहले सात ओभरमा दुई मेडन राख्दै २० रन दिएर तीन विकेट लिए। त्यस्तै ललितसिंह भण्डारीले ६ ओभरमा २१ रन दिएर तीन विकेट लिए। पवन सर्राफले दुई विकेट लिँदा ललित नारायण राजवंशी र सागर ढकालको नाममा एक-एक विकेट रह्यो।</p>
<p>त्यसअघि पुलिस क्लबका लागि दीपेन्द्रसिंहले ६४ बलमा पाँच चौका र दुई छक्का हान्दै ५० रन बनाए। अमित श्रेष्ठले ३७, अनिल साहले १९ तथा राशिद खानले १६ रन बनाए।</p>
<p>प्रदेश २ का लेग स्पिनर कुमार थापाले पाँच विकेट लिए। उनले पाँच विकेट लिने क्रममा १० ओभरमा तीन मेडन राख्दै ३२ रन खर्चिए। राहुलप्रताप सिंह र विवेक यादवले समान दुई विकेट लिए।</p>
<p>भाेलि, २६ पुसमा समूह ‘डी’ को सुदूरपश्चिम प्रदेशले मलेसियाको राष्ट्रिय क्रिकेट टीमसँग प्रतिस्पर्धा गर्नेछ।</p>
प्रतिक्रिया दिनुहोस्
.jpg)
