विद्यार्थी पढाउने कम्प्युटरमा माकुराको जालो
<p>भद्रपुर। झापाको बाह्रदशी गाउँपालिका- १ मा रहेको अमृत माध्यमिक विद्यालयमा कम्प्युटर शिक्षक नहुँदा कम्प्युटरहरु प्रयोगबिहीन छन्।</p>
<p>गत वर्ष प्रदेश सरकार र बाह्रदशी गाउँपालिका- १ ले सो विद्यालयलाई १९ कम्प्युटर दिएका थिए।</p>
<p>गाउँपालिकाले कम्प्युटर पढाउन तीन जना घुम्ती शिक्षक नियुक्तसमेत गरेको छ।</p>
<p>शिक्षकले पढाउन नभ्याउँदा विद्यालयको कोठामा रहेका कम्प्युटरमा माकुराले जालो लगाउन थालेका छन्।</p>
<p>प्रधानाध्यापक रामबहादुर बुढाथोकीले विद्यालयसँग कम्प्युटर शिक्षक नभएको र गाउँपालिकाका घुम्ती शिक्षक नियमित नआउँदा दाताले दिएका कम्प्युटर प्रयोगविहीन भएको बताए।</p>
<p>“घुम्ती शिक्षक हुनुहुन्छ, कहिले महीनामा एकपटक त कहिले १५ दिनमा आउनुहुन्छ”, प्रअ बुढाथोकीले भने।</p>
<p>कक्षा ५, ६, ७ र ८ मा कम्प्युटर विषय पढाइ हुन्छ। विद्यार्थीले व्यवहारिकताबिना किताबका सैद्धान्तिक शिक्षा पढेका र सुनेका भरमा परीक्षा दिन विवश रहेका छन्।</p>
<p>आदिवासी राजवंशी समुदायको बाहुल्य रहेको बाह्रदशी गाउँपालिकामा पाँच माध्यमिक तहसहित १६ सामुदायिक विद्यालय छन्।</p>
<p>ती विद्यालयमा कम्प्युटर पढाउन गाउँपालिकाबाटै तलब खुवाउने गरी तीन जना घुम्ती शिक्षक नियुक्त गरिएको गाउँपालिकाका शिक्षा शाखा प्रमुख ज्ञानबहादुर पौडेल बताउँछन्।</p>
<p>न्यून संख्यामा रहेका कम्प्युटर विषयका शिक्षकले विभिन्न विद्यालयमा आलोपालो पढाउनुपर्ने बाध्यता रहेको हुँदा समस्या भएको उनले बताए।</p>
<p>विद्यालयमा कक्षाकोठा र शिक्षक दरबन्दीको समेत अभाव छ ।</p>
<p> </p>
प्रतिक्रिया दिनुहोस्
.jpg)
