के १५ वर्षीया किशोरीको हत्यामा परिवारकै हात छ ?
<p>काठमाडौं। पर्साको पोखरिया नगरपालिका–९ शिवबर्वाकी १५ वर्षीया पुनिताकुमारी महतो तत्वा बेपत्ता भएको हल्ला गाउँभरी चल्यो। विद्यालयदेखि गाउँभर नै उनको सोधिखोजी भयो। </p>
<p>विद्यालय र गाउँलेले चासो राखे पनि परिवारका सदस्यमा भने कुनै चिन्ता देखाएनन्। करीब तीन साता अघिको यो घटनाबारे उनीहरूले प्रहरीमा उजुरी पनि गरेनन्। </p>
<p>गाउँकी बालिका बेपत्ता भएको खबर नजिकैको इलाका प्रहरी कार्यालयमा पुगिसकेको थियो। उजुरी नपरे पनि प्रहरीले घटनाबारे चासो देखाइरहेको थियो। </p>
<p>कक्षा ६ मा अध्ययन गर्ने उनी बेपत्ता भएकोबारे परिवारका सदस्यले बारम्बार झुटो बोल्दै आइरहेका थिए। “गाउँमा सोधिखोजी शुरू भएपछि कहिले भारत त कहिले मामा घर गएकी छन् भन्दै टार्दै आए”, पर्साका प्रहरी प्रमुख एसपी सोमेन्द्रसिंह राठोरले भने,“एक साता अघि उनीहरूले करेन्ट लागेर मृत्यु भएकाले दाहसंस्कार गरिसक्यौं भने।”</p>
<p>प्रहरीलाई पुनिताको हत्या भएको हुन सक्ने सूचना पुगिसकेको थियो। उनलाई गाडिएको छ भन्ने सूचनाका आधारमा प्रहरीले शंकास्पद १५ स्थानमा खनेर हेरिसकेको थियो। तर, कुनै संकेत पाएको थिएन। </p>
<p>हत्या गरिएकी बालिका गाउँकै एकजना केटा साथीसँग नजिकिएको देखेर उनलाई परिवारका सदस्यले पटक–पटक कुटपिट गरेको खबर गाउँलेले प्रहरीलाई दिएका थिए।</p>
<p>“दाहसंस्कार नगर्ने ठाउँमा एकदिन ठूलो आगो बलेको सूचना हामीले पायौं,” उनले देखापढीसँग भने,“त्यहाँ गएर अनुसन्धान गर्दा हिजो हामीले मासुको डल्लो र केही हड्डी फेला पारेका छौंं।”</p>
<p>प्रहरीले हत्या गरेर जलाएको आरोपमा बालिकाकी आमा शिवकली देवी (३०), सोही ठाउँका राजेन्द्र महतो तत्वा (३९), सन्तोष महतो तत्वा (२८) र सोही नगरपालिका–८ का सुबोध भनिने जितेन्द्र यादव (१९) लाई पक्राउ गरेको छ। </p>
<p>प्रहरीले बालिकाको हत्या गरेर जलाएको आरोपमा उनीहरूलाई पक्राउ गरी अनुसन्धान अगाडि बढाएको भए पनि आरोपीले स्वीकार गरिसकेका छैनन्।</p>
<p>राजेन्द्र र सन्तोष पुनिताका काका हुन्। बालिकाका बुवा वीरेन्द्र महतो तत्वा फरार रहेको प्रहरीले जनाएको छ। </p>
<p>“प्रहरीले मासुको डल्लो र हड्डी फेला पारेकै स्थानमा पुनितालाई जलाएको आरोपी चारैजनाले स्वीकार गरेका छन्”, एसपी राठोरले भने,“तर, उनीहरूले करेन्ट लागेर मृत्यु भएपछि दाहसंस्कार गरेको दावी गरेका छन्।”</p>
<p>“शव छैन, जलाएको उनीहरूले स्वीकार गरिसकेका छन्। धेरै तथ्य हामीले पाइसकेका छौं”, एसपी राठोरले भने,“चारैजनाले घटनाको बारेमा हुबहु एउटै बताउँछन्। बाँकी तथ्य खुल्दै जाला।”</p>
<p> </p>
<p><strong>पढ्नुहाेस्</strong></p>
<p><strong><a href="https://dekhapadhi.com/news/4897" target="_blank">बालिका हत्याको आरोपमा आमासहित चार जना पक्राउ</a></strong></p>
प्रतिक्रिया दिनुहोस्
.jpg)
