हिमपातले मुगु सञ्चारबिहीन
<p>रारा। हिमपातका कारण जुम्लाको डाँफे लेकको टेलिकमको टावरको रेडियो लिङ्कमा समस्या ल्याएपछि मुगुमा सञ्‍चार सम्पर्क विच्छेद भएको छ।</p>
<p>एडीएसएल इन्टरनेट सेवा पनि जिल्लाभर अवरुद्ध भएको छ। १७ पुसदेखि सो क्षेत्रमा हिमपात भएको छ।</p>
<p>इन्टरनेट अवरुद्ध भएपछि सरकारी तथा गैरसरकारी संघसंस्था, वित्तीय कारोवार गर्ने सहकारी तथा बैंक र स्थानीय तहको सेवा प्रवाह प्रभावित भएको छ।</p>
<p>राष्ट्रिय वाणिज्य बैंक शाखा कार्यालय मुगुका प्रबन्धक हरिन्द्र बोहोराले इन्टरनेट सेवा अवरुद्ध हुँदा बैंकको काम गर्न नसकिएको बताए।</p>
<p>इन्टरनेट सेवा नचलेपछि विभिन्न सेवा आयोगमा खुलेका विज्ञापनका लागि आवेदन फाराम भर्न र राजश्व दस्तुर जम्मा गर्न पाएका छैनन्।</p>
<p>डाँफेलेकमा बाक्लो हिउँ जमेको र मौसममा सुधार नआएकाले टावरमा के-कस्तो समस्या हो बुझ्न जान नसकेको टेलिकमको मुगु कार्यालयले जनाएको छ। <em>रासस</em></p>
प्रतिक्रिया दिनुहोस्
.jpg)
