इरान-अमेरिका तनावः के गर्दैछन् इराकमा रहेका नेपाली कामदार ?
<p>काठमाडौं। इराकको राजधानी बग्दादस्थित अमेरिकी बेस क्याम्पमा रहेका नेपालीसहित विदेशी कामदारलाई आ–आफ्नो देश फर्काउन थालिएको छ।</p>
<p>उक्ता क्याम्प सुरक्षाका हिसाबले उच्च जोखिममा पर्छ। क्याम्पभित्र करीब दुई सय नेपाली कार्यरत् छन्।</p>
<p>इरान र अमेरिकाबीच तनाव चुलिएपछि बग्दादस्थित अमेरिकी सेनाका लागि सहयोगीको काम गरिरहेका कम्पनीले आवश्यक कामदार राखेर बाँकीलाई २० पुसदेखि फर्काउन थालेका हुन्।</p>
<p>२०-२१ पुसमा फर्काइएको नेपाली टोलीमा सात जना छन्।</p>
<p>“कम्पनीले हामीलाई जतिखेर पनि फर्काउने अवस्थामा तैनाथ गरेर राखेको छ”, अमेरिकी बेस क्याम्पभित्र स्टोर म्यानेजरका रूपमा कार्यरत सुरज तामाङले फोनमा भने, “आ-आफ्नो लगेज प्याक गरेर राखिसकेका छौं।”</p>
<p>१२ वर्षदेखि क्याम्पमा कार्यरत तामाङले कम्पनीबाट खबर आउनेबित्तिकै इराक छोड्ने तयारीमा आफूहरू रहेको बताए।</p>
<p>अमेरिकी बेस क्याम्पभित्र धेरै कम्पनी काम गर्छन्। ती कमपनीले अत्यावश्यक संख्याका कामदार मात्र राखेर बाँकीलाई सामान्य अवस्था बनेपछि बोलाउने सर्तमा फर्काइरहेका छन्।</p>
<p>“स्थिति यसरी प्रतिकूल भइदिन्छ जस्तो लागेको थिएन”, अमेरिकी सेनाको कफी सपमा कार्यरत दोलखाका बद्री खत्रीले भने, “अहलिेसम्म सुरक्षित छौं, यहाँबाट छिटो निस्कन पाए हुन्थ्यो।”</p>
<p>उनी काम गर्ने कफी सप तीन दनिदेखि बन्द छ।</p>
<p>क्याम्पभित्र नेपालीहरू खाना बनाउने, सरसफाइ गर्ने र निर्माण कार्यमा संलग्न् छन्।</p>
<p>क्याम्पबाट बाहिर निस्कने कसैलाई अनुमति छैन।</p>
<p>भित्र पनि सबै ठाउँमा जाने पहुँच नभएकाले क्याम्पभित्रकै पनि सबै नेपालीसँग भेटघाट हुन नपाउने आजको कान्तिपुर दैनिकले समाचार लेखेको छ।</p>
<p>यसैबीच अमेरिकाले इरानी सेनाका जनरल कासिम सुलेमानीको इराकमा हत्या गरेपछि सरकारले इराकलगाय मध्यपूर्वी देशमा रहेका नेपालीको सुरक्षामा सतर्कता अपनाएको आजको नयाँ पत्रिकाले समाचार छापिएको छ।</p>
<p>परराष्ट्र मन्त्रालयले ती देशमा रहेका नेपालीसँग नियमित सम्पर्कमा रहन र निरन्तर जानकारी गराउन राजदूतहरूलाई निर्देशन दिएको छ।</p>
प्रतिक्रिया दिनुहोस्
.jpg)
