यसरी भयो दिल्लीको जेएनयूमा विद्यार्थी र शिक्षकमाथि सांघातिक आक्रमण
<p>काठमाडौं। सबैभन्दा ठूलो लोकतन्त्र भनिने भारतमा २० पुस साँझ भने विश्व विद्यालयभित्रै प्रवेश गरेर विद्यार्थीमाथि आक्रमण भएको छ।</p>
<p>हातमा लाठी र छड बोकेर प्रवेश गरेका नकाबधारीहरूको हमलामा परेर जवाहरलाल नेहरु (जेएनयू) विश्वविद्यालयका विद्यार्थी र शिक्षक घाइते भएका छन्। आक्रमणबाट २६ जना घाइते भएका छन्।</p>
<p>प्रत्यक्षदर्शी र घाइतेहरूले सयभन्दा बढी नकावधारीहरू प्रवेश गरेको बताएका छन्।</p>
<p>ती मानिसहरू सत्तारूढ भारतीय जनता पार्टीको भातृ संगठन अखिल भारतीय विद्यार्थी परिषद (एबीभीपी) सँग सम्बन्धित भएको जेएनयूको विद्यार्थी युनियनको आरोप छ।</p>
<p>प्रत्यक्षदर्शीहरूले ती आक्रमणकारीलाई रोक्न प्रहरीले कुनै प्रयास नगर्दा उनीहरू क्याम्पसभित्र छिर्न सफल भएको समेत आरोप लगाएका छन्।</p>
<p>आक्रमणमा परेर जेएनयू विद्यार्थी युनियनकी अध्यक्ष आयशी घोषसहित २२ विद्यार्थी घाइते भएका छन्। साथै दुई शिक्षक र दुई गार्ड समेत घाइते भएका छन्। घाइते सबैलाई अस्पताल भर्ना गरिएको छ।</p>
<p>आक्रमणकारीहरूले उद्वारका लागि पुगेका डाक्टर र एम्बुलेन्समाथि पनि आक्रमण गरेका थिए।</p>
<p>आक्रमण बेलुका साढे ६ बजे शुरू भएको थियो। त्यतिबेला ‘जेएनयू टिचर्स एशोसिएसन’ले आयोजना गरेको सद्भाव र्याली समापन हुँदैथियो।</p>
<p>शुल्क वृद्धिको विरोधमा तीन महीनादेखि आन्दोलित जेएनयूका बाम विद्यार्थी र एबीभीपीका विद्यार्थीबीच बढ्दो तनाव कम गर्न आह्वान गर्दै उक्त र्‍याली आयोजना गरिएको थियो।</p>
<p>साढे ७ बजे मात्रै प्रहरी क्याम्पस परिसर बाहिर पुगेको थियो। तर सधैंजस्तै सामान्य र्‍याली भएको भन्दै प्रहरी क्याम्पसभित्र प्रवेश गरेन।</p>
<p>प्रत्यक्षदर्शीका अनुसार, नकावधारीहरू आक्रमणभन्दा एक घण्टा पहिले ‘पेरियार होस्टल’मा जम्मा भएका थिए ।</p>
<p>"उनीहरूले हिन्दीमा बोल्दै हामीलाई दुर्व्यवहार गर्न थाले। जब म भाग्न थाले उनीहरूले फलामे रडले मेरो शिरमा प्रहार गरे। मलाई टाउको र हातमा चोट लागेको छ", अस्पतालमा भर्ना भएका एक विद्यार्थीले भने।</p>
<p>सयभन्दा बढी नकावधारीहरू हातमा लाठी र रड बोकेर अघि बढ्न थालेको देखेपछि शिक्षकहरूले उनीहरूलाई शान्त पार्ने प्रयास गरेका थिए। तर भीडले शिक्षकमाथि नै आक्रमण गर्न थाल्यो।</p>
<p>"उनीहरूले हामीलाई ठूला-ठूला ढुंगाले प्रहार गर्न थाले। र कुटपीट गरे", एक शिक्षकले भने।</p>
<p>आक्रमणबाट प्राध्यापक शुक्ला शावन्तले शिर र ढाडमा आक्रमण भएको बताइन्। "उनीहरू हामी सबैमाथि ढुंगा हान्न र कुट्न शुरू गरे", उनले भनिन्।</p>
<p>"जेएनयु गेटमा प्रहरी थियो तर उसले रोक्ने प्रयास नै गरेन। हामी दुई घण्टासम्म यो होस्टलदेखि त्यो होस्टलसम्म भागिरह्यौं", प्राध्यापक अतुलले भने।</p>
<p>विद्यार्थीका अनुसार कम्तिमा सातवटा होस्टलमा आक्रमण भएको छ। ती होस्टलका ढोका भाँचिएका छन्। झ्याल फुटेका छन्। विद्यार्थीका सामग्रीहरू गल्लीभरि छरिएका छन्।</p>
<p>एउटा भिडिओमा महिलाहरूले भीडलाई फर्किन भन्दाभन्दै पनि पुरूष आक्रमणकारीहरूले उनीहरूलाई हतियारले आक्रमण गरेको देखिएको छ।</p>
<p>एबीभीपीले यो हिंसामा आफ्नो कुनै संलग्नता नरहेको दावी गरे पनि सबैजसो प्रतिपक्षी पार्टीहरूले उसको दाबीलाई अस्वीकार गरेका छन्। उनीहरूले भारतीय जनता पार्टी समर्थकहरूले नै आक्रमण गरेको दाबी गरेका छन्।</p>
प्रतिक्रिया दिनुहोस्
.jpg)
