राजमार्गको जामले बाटोमै बिरामीको मृत्यु्
<p>काठमाण्डौं। मिर्गौलासम्बन्धी समस्या भएका एक बिरामीको त्रिभुवन राजपथमा भएको लगातारको सवारी जामका कारण बसभित्रै मृत्यु भएको छ।</p>
<p>रौतहटको गौर नगरपालिका–७ का ३५ वर्षीय रुपलाल शाहको उपचारका लागि काठमाडौं ल्याउँदै गर्दा मृत्यु भएको हो।</p>
<p>उनको ना ७ ख ५३६४ नम्बरको बसमा मृत्यु भएको धादिङको महादेवबेंसी प्रहरी चौकीका प्रहरी सहायक निरीक्षक बाबुलाल श्रेष्ठले बताए। </p>
<p>दुवै मिर्गौलाले काम गर्न छाडेपछि शाहलाई डायलासिसका लागि सार्वजनिक यातायातमा काठमाडौं ल्याइँदै थियो । लामो जाममा १२ घण्टाभन्दा बढी समय कुर्नु पर्दा उनको धादिङको थाक्रे गाउँपालिका–२ हुलाकडाँडास्थित राजमार्गमा बसभित्र बिरामीको मृत्यु भएको महादेवबेंसीस्थित जनजागृति माविका शिक्षक रामचन्द्र रुपाखेतीले बताए । </p>
<p>एम्बुलेन्समा ल्याउन पैसा अभाव भएपछि शाहलाई रात्रि बस चढाएर ल्याइँदै थियो । शाहको शव बाटोबाटै रौतहट लैजाने तयारी भइरहेको छ। आमा, भाइ र दाजुसँगै शाह बसमा काठमाडौँ आउँदै थिए । आमासँगै सिटमा बसेका शाहको उनको काखमै मृत्यु भएको हो। </p>
<p>सडक मर्मतको काम र ठूला सवारीसाधनका कारण झण्डै ३० किलोमिटर क्षेत्रमा जाम लागेको थियो । एम्बुलेन्ससमेत आवतजावत गर्न नसक्नेगरी सडक चार दिनदेखि अवरुद्ध भइरहेको छ । दशैँका लागि घर निस्केका यात्रु बाटोमै अलपत्र छन् । <em>रासस</em><br />
</p>
प्रतिक्रिया दिनुहोस्
.jpg)
