बाजुरामा जीप दुर्घटनाः मृत्यु हुने चारैजनाको सनाखत
<p>बाजुरा। बाजुरामा आज भएको जीप दुर्घटनामा मृत्यु हुने चारैजनाको सनाखत भएको छ।</p>
<p>मृत्यु हुनेमा जीपका चालक बाजुरा जगनाथ गाउँपालिका–५, गोत्रीका रमेशबहादुर शाही (२७), हिमाली गाउँपालिका–६, धुलाचौरका पवन भण्डारी (३५), मुगुको मुगुमकार्मारोङ गाउँपालिका–८ का पेम्बा लामा (३८) र कैलाली पन्याल गाउँपालिका–५ का दिनेशकुमार घर्तीमगर (३३) रहेको जिल्ला प्रहरी कार्यालय बाजुराका डीएसपी उद्धवसिंह भाटले जानकारी दिए।</p>
<p>अन्य चारजना घाइते भएका छन् भने एकजना अझै बेपत्ता रहेको बाजुरा प्रहरीले जनाएको छ। हराइरहेकी बाजुरा स्वामीकार्तिक खापर गाउँपालिका–४ की सुशीला विक (१३)को खोजी कार्य जारी रहेको प्रहरीको भनाइ छ।</p>
<p>घाइते हुनेमा मुगुम कार्मारोङ गाउँपालिका–८ का गोल्जो लामा (२०), सोही ठाउँका छेत्तोङ लामा (२१), बाजुरा बुढीनन्दा गाउँपालिका–६ की सरु विक (२२) र उनकी छोरी स्मृति विक (२) रहेका छन्।</p>
<p>प्रहरीका अनुसार नेपाली सेनाको हेलिकप्टरबाट घाइतेहरूलाई नेपालगन्ज मेडिकल कलेज शिक्षण अस्पताल कोहलपुर लगिएको छ। से १ ज १०६४ नम्बरको जीप धुलाचौरबाट कोल्टी जाँदै गर्दा दिउँसो सवा १ बजे हिमाली गाउँपालिका-६, कालागडस्थित कर्णाली नदीमा खसेको थियो।</p>
<p>दुर्घटनाको कारण खुल्न नसकेको डीएसपी भाटकाे भनाइ छ।</p>
प्रतिक्रिया दिनुहोस्
.jpg)
