६ महीनामै पुछियो सरिताको सिउँदो
<p>काठमाडौं। महीना दिनको छुट्टीपछि ५ पुसमा जाँदै गर्दा भारतीय सेनामा कार्यरत अर्जुन थापा यति छिटो सधैँका लागि बिदा होलान् भन्ने उनका परिवारले सोचेका थिएनन्।</p>
<p>तर, गोरखा नगरपालिका-५ डुम्रीडाँडा रिपका २५ वर्षीय थापाले बुधकार भारत-पाकिस्तान सीमामा भएको झडपमा परी जीवन गुमाउनुपर्‍यो। </p>
<p>भारतीय सञ्‍चारमाध्यमले जनाए अनुसार १६ पुसको राति कास्मिरमा भारत र पाकिस्तानी सेनाबीच गोली हानाहान हुँदा मगरको मृत्यु भएको थियो।</p>
<p>भारतीय सैनिक प्रवक्ता लेफ्टिनेन्ट कर्णेल देवेन्द्र आनन्दका अनुसार मगरसँगै भारतीय नागरिक सन्दीप रघुनाथको पनि मृत्यु भएको छ।</p>
<p>एसएलसी सकेर भर्खर प्लस टू पढ्दै गर्दा भारतीय सेनामा भर्ती भएका अर्जुनले गत असारमा मात्र विवाह गरेका थिए। </p>
<p>अर्जुनको मृत्युको खबर सुनेपछि अहिले गाउँ नै शोकमा डुबेको उनकी भाउजु पर्ने गोमा थापा मगरले बताइन्। </p>
<p>"विहे भाको छ महीना पनि नपुग्दै कलिलो उमेरमा हामी सबैलाई छाडेर गएको दु:खद खबर यो कानले सुनुपर्‍यो", गोमाले देखापढीसँग भनिन्। </p>
<p>अर्जुनले घटना हुने रात श्रीमती सरितासँग फेसबुक मेसेन्जरमा कुरा गरेको उनले भनिन्। </p>
<p>अर्जुनकी आमा बितिसकेकी छन्। परिवारमा उनी एक्ला छोरा हुन्।</p>
<p>घरमा उनका बुवा, श्रीमती र एक जना दिदी छन्। </p>
<p>छोराको शव बुझ्न बुहारी र छोरीलाई लिएर अर्जुनका बाबु काँकडभित्ता नेपाल-भारत सीमा काँकडभित्ता नाका गएको खबर आफूले थाहा पाएको गोरखा नगरपालिका-५ का वडाध्यक्ष रामकुमार थापा मगरले बताए। </p>
प्रतिक्रिया दिनुहोस्
.jpg)
