उड्डयन विधेयक रोक्ने गतिविधि गरे कारबाही गर्ने पर्यटनमन्त्रीको चेतावनी
<p>काठमाडौं। संस्कृति, पर्यटन तथा नागरिक उड्डयन मन्त्री योगेश भट्टराईले नगरिक उड्डयन सम्बन्धी विधेयक रोक्ने गतिविधि नगर्न कर्मचारीहरूलाई चेतावनी दिएका छन्।</p>
<p>नेपाल नागरिक उड्डयन प्राधिकरणको २१ औं वार्षिकोत्सवका अवसरमा आज आयोजित कार्यक्रममा मन्त्री भट्टराईले कर्मचारीको आन्दोलनबाट विधेयक नरोकिने स्पष्ट पारे।</p>
<p>कर्मचारीहरूले प्राधिकरणलाई विभाजन गर्न लागेको भन्दै आन्दोलन गर्ने धम्की दिएपछि मन्त्री भट्टराईले प्राधिकरणमा क्षति हुने गरी कुनै पनि गतिविधि भए संलग्नबाटै क्षतिपूर्ति भराइने चेतावनी दिए। </p>
<p>कर्मचारीका केही समस्या भए छलफलबाट समाधान गर्न आफू तयार रहेको बताएका पर्यटन मन्त्री भट्टराईले आन्दोलन गरेर अवरोध गर्न खोजे कारबाही गरिने चेतावनी दिएका हुन्।</p>
<p>कार्यक्रममा आधिकारिक कर्मचारी ट्रेड युनियनका अध्यक्ष श्रवणकुमार यादवले प्राधिकरणलाई विभाजन गर्नेगरी विधेयक ल्याउन लागिएको भन्दै आन्दोलन गर्ने चेतावनी दिएका थिए। </p>
<p>अघिल्लो साउनमा मन्त्रीपरिषद्ले नेपाल नागरिक उड्डयन प्राधिकरण ऐन र नेपाल हवाई प्राधिकरण ऐन गरी दुई छुट्टाछुट्टै ऐन ल्याउन संस्कृति पर्यटन तथा नगारिक उड्डयन मन्त्रालयलाई सैद्धान्तिक स्वीकृति दिएको थियो। </p>
<p>योसँगै नेपाल नागरिक उड्डयन प्राधिकरणलाई सेवा प्रदायक र नियमनकारी निकायका रुपमा छुट्याउने गरी ऐन आउने भएको हो । अध्यक्ष यादवले सरकारले प्राधिकरणलाई टुक्रा-टुक्रा पार्न लागेको भन्दै आन्दोनलको घोषणा गरिसकेको बताएका थिए। विधेयकको विरोधमा आधिकारीक ट्रेड युनियनले २९ मंसीरमा नै चरणबद्ध आन्दोलनका कार्यक्रम घोषणा गरेको थियो। </p>
<p>युनियनले १६ देखि १८ पुससम्म कालो पट्टी बाँधेर काम गर्ने, २० देखि २२ पुससम्म पेन डाउन गर्ने तथा २३ देखि २५ पुससम्म महानिर्देशकको कार्यकक्ष घेराउ गर्ने लगायतका विरोधका कार्यक्रम गर्दैछ।</p>
प्रतिक्रिया दिनुहोस्
.jpg)
