हुम्लामा चामल राजनीति, नेताको सिफारिसमा अनुदानको चामल
<p>हुम्ला। हुम्लामा खाद्य व्यवस्था तथा व्यापार कम्पनी लिमिटेडमार्फत वितरण हुने अनुदानको चामल पाउन नेताको चिट (सिफारिस) लिनुपर्ने बाध्यता अझै हटेको छैन। </p>
<p>यसले पहुँचवालाले पर्याप्त चामल पाउने र सर्वसाधारण रित्तो हात फर्कनुपर्ने अवस्था छ। </p>
<p>अनुदानको चामल पाउने नेताको चिट लिनुपर्ने भएपछि खार्पुनाथमा चामल राजनीति चुलिँदै गएको छ।</p>
<p>यो वर्ष खाद्य संस्थानको खार्पुनाथ विक्री केन्द्रमा पाँच सय क्विन्टल चामलको कोटा छ। ठेकेदारले केन्द्रमा २७९ क्विन्टल झारिसकेका छन्। बाँकी चामल बाटोमै छ। </p>
<p>कोटाअनुसार चामल आइनपुग्दै विगतमा जस्तै अहिले पनि स्थानीय नेताले चामल राजनीति थालिसकेको आजको नागरिक दैनिकमा समाचार छ। </p>
<p>बिक्री केन्द्रमा आइसकेको चामल सांसद र नेताको चिटका आधारमा वितरण हुन थालेपछि नेकपा र नेपाली कांग्रेसबीच चामल राजनीतिको होड बढेको छ। </p>
<p>खापुँनाथ गाउँपालिका अध्यक्ष कर्णबहादुर रावल ठेकेदारले अनुदानको चामल गाउँपालिकालाई बुझाउने बताउँछन्। </p>
<p>केन्द्रमा आएको चामल प्रमुख जिल्ला अधिकारीले जारी गर्ने कुपन र नेताको चिटका आधारमा बाँडिन्छ। </p>
<p>अध्यक्ष रावलले भने, “नेकपाका नेताका कारण चामल वितरणमा राजनीति भइरहेको छ। नेपाली कांग्रेस प्रमुख जिल्ला अधिकारीले दिने कुपनका आधारमा चामल बाँड्नुपर्ने अडानमा छ।”</p>
<p>नेकपा सांसद र नेताले चिटका आधारमा चामल बाँड्न थालेपछि कांग्रेस सांसदले पनि चिट बाँड्न थालेका छन्। </p>
<p>सिमिकोटमा आयोजित कांग्रेस जनजागरण कार्यक्रमअन्तर्गतको विरोधसभामा कर्णाली प्रदेशका सांसद जीवनबहादुर शाहीले अनुदानको चामलको लागि चिट काटे।</p>
<p>सांसद शाहीले दिएको चिट लिएर कांग्रेस कार्यकर्ता खाद्य संस्थानको कार्यालयमा चामल लिन पुगे। </p>
<p>कांग्रेस कार्यकर्ता चामल उठाउन थालेपछि नेकपाका कार्यकर्ताले त्यसको विरोध गर्दै गोदाममा ताला लगाउन पुगे।</p>
<p>उनीहरूले लगाएको ताला गाउँपालिका अध्यक्ष र प्रहरीले खोलेका छन्। </p>
प्रतिक्रिया दिनुहोस्
.jpg)
