सवारी दुर्घटनामा ४ जनाको मृत्यु
<p>काठमाडौं। तनहुँ, सिरहा र मोरङमा भएका फरक सवारी दुर्घटनामा परी चार जनाको मृत्यु भएको छ। </p>
<p>तनहुँको घिरिङ गाउँपालिका-५ देउरालीस्थित सडकमा ग.२ त. ८६३४ नम्बरको ट्याक्टर अनियन्त्रित भई सोमबार राति दुर्घटना हुँदा एक जनाको मृत्यु भएको थियो।</p>
<p>मृत्यु हुनेमा ट्याक्टरमा सवार बझाङ घर भएका २३ वर्षीय हेमन्त पातली रहेका छन्। दुर्घटनामा गम्भीर घाइते भएका उनको जिपी कोइराला स्वास प्रस्वास उपचार केन्द्र बेलचौतारामा उपचारको क्रममा मृत्यु भएको थियो। </p>
<p>दुर्घटनामा घाइते भएका अन्य ४ जनाको सोही अस्पतालले थप उपचारको लागि मणिपाल अस्पताल पोखरा रिफर गरेको छ। अन्य २ जना उपचार पश्चात डिस्चार्ज भएको प्रहरीले जनाएको छ। ट्याक्टर चालकलाई प्रहरीले नियन्त्रणमा लिएको छ। </p>
<p>सिरहाको लहान नगरपालिका–३ मा स.६ प. ७२९९ र स.११ प. २४०२ नम्बरका दुई मोटरसाइकल सोमबार राती एकआपसमा ठोक्किँदा एक जनाको मृत्यु भएको छ। मृत्यु हुनेमा स.११ प. २४०२ नम्बरको मोटरसाइकलमा सवार सोही ठाउँ बस्ने १५ वर्षीया संगीता महतो रहेकी छन्।</p>
<p>दुर्घटनामा घाइते भएकी संगीताको फ्रेण्डस मोडेल अस्पताल लहान हुँदै थप उपचारको क्रममा विराटनगर पुर्याइदा त्यहाँ मृत्यु भएको हो। दुर्घटनामा घाइते भएका दुवै मोटरसाइकल चालकको फ्रेण्डस मोडेल अस्पतालमा उपचार भइरहेको छ। </p>
<p>मोरङको पथरी शनिश्चरे नगरपालिका–२ हरियाली सामुदायिक वन नजिक को.१ च. ९९४५ नम्बरको स्कोर्पियो र हाल नम्बर नखुलेको मोटरसाइकल सोमबार दिउँसो एकआपसमा ठोक्किदा दुई जनाको मृत्यु भएको छ। </p>
<p>मृत्यु हुनेहरुमा मोटरसाइकलमा सवार मिक्लाजुङ नगरपालिका-४ बस्ने सन्तोष लिम्बु र सोही ठाउँ बस्ने २६ वर्षीय सुनिल धमला रहेका छन्। </p>
<p>दुर्घटनामा गम्भीर घाइते भएका धमलालाई उपचारको लागि मंगलबारे अस्पतालतर्फ लैजाने क्रममा बाटैमै मृत्यु भएको हो भने लिम्बुको न्यूरो अस्पताल विराटनगरमा उपचारको क्रममा मृत्यु भएको हो। </p>
<p>स्कोर्पियो र चालकलाई प्रहरीले नियन्त्रणमा लिएको छ। मोटरसाइकल भने आगो लागेर नम्बर समेत नचिनिने भएको प्रहरीले जनाएको छ। <br />
</p>
प्रतिक्रिया दिनुहोस्
.jpg)
