अमेरिकी आतंकवादी सूचीबाट सुडान हट्यो
<p>वासिङ्टन। अमेरिकाले सुडानलाई आतंकवादी राष्ट्रको सूचीबाट हटाएको छ। अमेरिकी संसदले सुडानलाई उक्त सूचीबाट हटाउने प्रस्ताव पारित गरेको हो।</p>
<p>यो प्रस्ताव पारित भएसँगै सुडानले सबै राष्ट्रसँग मैत्रीपूर्ण सम्बन्ध पुन: कायम गर्ने बाटो खुलेको छ। सन् २००१ को सेप्टेम्बरमा अमेरिकी दूतावासहरु माथि भएको आक्रमणको दोष अमेरिकाले सुडानमाथि लगाउँदै आएको थियो।</p>
<p>उक्त घटनामा भएको जनधनको क्षतिबापत करोडौं डलर क्षतिपूर्ति तिर्न सुडान सरकार तयार भएपछि अमेरिकाले सुडानमाथिका प्रतिबन्धहरु हटाउन मञ्जुर भएको हो। </p>
<p>सुडानमाथि आतंकवादीलाई प्रश्रय दिने राष्ट्रको सूचीबाट सुडानलाई अमेरिकाले गत साता हटाएको थियो। सुडानले इजरायलसँगको सम्बन्ध सामान्यीकरण गर्न सहमति जनाएको दुई महिना नपुग्दै अमेरिकाले उक्त निर्णय गरेको एएफपीले बताएको हो।</p>
<p>कोरोनाभाइरस महामारीको चपेटामा परेर आर्थिक संकटमा परेको सुडान अहिले राजनीतिक संक्रमणकालमा रहेको छ। अमेरिकाले सुडानलाई आर्थिक सहायता, ऋण मोचन र लगानीका लागि पनि सघाउने जनाएको छ। </p>
<p>सुडानलाई अमेरिकाले ७० करोड आर्थिक सहायताका साथै अन्तर्राष्ट्रिय मुद्रा कोषलाई भुक्तानी गर्नुपर्ने थप १२ करोड डलर ऋण चुक्ता गर्न सघाउने बताएको छ। अमेरिकामा रहेका सुडान सरकारका बैंक खाताहरु पनि अब खुला हुनेछन्।</p>
<p>सुडानले १९९८ मा केन्या र तान्जानियास्थित अमेरिकी दूतावासमा अलकायदाद्वारा भएका हमलाका पीडितलाई क्षतिपूर्तिबापत ३३ करोड ५० लाख डलर भुक्तानी गर्न सहमति जनाएको थियो। </p>
<p>उक्त हमलाहरु सुडानका तत्कालीन राष्ट्रपति ओमार अल–बसिरको शासनकालमा भएका थिए जतिबेला आतंकवादी संगठन अलकायदाका नेता बिन लादेन सुडानमा रहेका थिए।</p>
प्रतिक्रिया दिनुहोस्
.jpg)
