वन रक्षकविरुद्ध भ्रष्टाचार मुद्दा
<p>काठमाडौं। अख्तियार दुरुपयोग अनुसन्धान आयोगले सैनामैना सवडिभिजन वन कार्यालय रूपन्देहीमा वन रक्षक पदमा कार्यरत प्रेमचन्द्र विश्वकर्मा विरुद्ध भ्रष्टाचार मुद्दा दायर गरेको छ।</p>
<p>विश्वकर्माले सेवाग्राहीसँग १२ हजार रुपैयाँ घुस लिएको पुष्टि भएको जनाउँदै अख्तियारले आज विशेष अदालत काठमाडौंमा उनीविरुद्ध मुद्दा दायर गरेको हो।</p>
<p>विश्वकर्माले पुर्जीवाला चिरान काठ ओसारपसार गर्न सहयोग गरेबापत सेवाग्राहीसँग घुस मागेको भन्ने उजुरी परेपछि अख्तियारले उनीमाथि अनुसन्धान सुरु गरेको थियो।</p>
<p>यसैक्रममा बुटवलस्थित अख्तियारबाट खटिएको टोलीले केही दिनअघि उनलाई सेवाग्राहीबाट १२ हजार रुपैयाँ घुस लिएको अवस्थामा नियन्त्रणमा लिएको थियो।</p>
<p>नियन्त्रणमा लिई थप अनुसन्धान हुँदा उनले घुस लिएको पुष्टि भएपछि आज मुद्दा दायर गरिएको अख्तियारद्वारा जारी विज्ञप्तिमा उल्लेख छ।</p>
<p>दायर गरिएको मुद्दामा उनीसँग १२ हजार रुपैयाँ बिगो दाबी गरिएको छ।<br />
</p>
प्रतिक्रिया दिनुहोस्
.jpg)
