बुबाले प्रहरीमा पुर्याएपछि हत्यामा संलग्न पक्राउ
<p>काठमाडौं । महोत्तरीको बर्दिवास नगरपालिका–१४ को सुगम बस्तीकी ६ वर्षीया बालिका गुलाप्सा खातुनको हत्या आरोपमा एक युवक पक्राउ परेका छन्।</p>
<p>इलाका प्रहरी कार्यालय बर्दिबासको प्रहरी टोलीले गएराति बालिकाको हत्या आरोपमा २६ वर्षीया अरूणकुमार साहलाई पक्राउ गरेको हो।</p>
<p>उनी गौशाला नगरपालिका–५ जिरो माइलका हुन्।</p>
<p>प्रारम्भीक अनुसन्धानको क्रममा पक्राउ परेका साहले उनको पसलमा सामान किन्न आएकी ती बालिकालाई पसलको पछाडिको कोठामा लगी तौलियाले घाँटी थिच्दा मृत्यु भएको बताएको प्रहरीले जनाएको छ। </p>
<p>बालिकाको मृत्युपछि शव आफू सुत्ने कोठामा लगेर राखेको र सोमबार साँझ शव बोरामा हाली घर भन्दा अन्दाजी ४० मिटर टाढा बारीमा फालेको खुलेको छ।</p>
<p>घटनाको अनुसन्धानमा संलग्न एक प्रहरी अधिकृतका अनुसार घटनापछि अरूणले गौशाला नगरपालिका–५ स्थित घरमा गइ घर परिवारलाई घटनाबारे जानकारी गराएको पाइएको छ।</p>
<p>उनलाई बुबाले इलाका प्रहरी कार्यालय गौशालामा पुर्‍याएपछि प्रहरीले पक्राउ गरेको हो।</p>
<p>घटनाको विषयलाई लिएर मृतकका आफन्त र स्थानीयले साहको पसल भएको घरमा आगजनी गरेका छन्। साथै, बर्दिबास नगरपालिका–१४ स्थित चोकमा सडक अवरोध गरेका छन्। </p>
<p>घटनास्थलमा जिल्ला प्रहरी कार्यालय महोत्तरी, इलाका प्रहरी कार्यालय बर्दिबास तथा सशस्त्र प्रहरी बलबाट समेत खटिएको प्रहरीले स्थितिलाई नियन्त्रणमा लिने प्रयास तथा घटनाबारे आवश्यक अनुसन्धान गरिरहेको छ।</p>
प्रतिक्रिया दिनुहोस्
.jpg)
