बिर्तामोडमा जीपको ठक्करबाट एक युवकको मृत्यु
<p>काठमाडौं। झापाको बिर्तामोड नगरपालिका-६, स्टाफचोकमा हिजो साँझ बलेरो जीपको ठक्करबाट एक युवकको मृत्यु भएको छ।</p>
<p>मृत्यु हुनेमा पैदलयात्री तेह्रथुमको आठराई गाउँपालिका-६ का २५ वर्षीय केवल खवास रहेका छन्। </p>
<p>पैदल हिँडिरहेका उनलाई हिजो साँझ सवा ६ बजे मे १ ज ३११९ नम्बरको बलेरो गाडीले ठक्कर दिएको थियो। </p>
<p>गम्भीर घाइते भएका उनको उपचारका क्रममा बी एण्ड सी अस्पताल बिर्तामोडमा मृत्यु भएको हो।</p>
<p>गाडीसहित चालकलाई इलाका प्रहरी कार्यालय अनारमानी झापाले नियन्त्रणमा लिएको छ।</p>
<p>यस्तै, सुनसरीको इटहरी उपमहानगरपालिका-३, त्रिवेणी चोकमा हिजो साँझ म्याजिक भ्यानको ठक्करबाट एक बालिका गम्भीर घाइते भएकी छन्। स्थानीय पोष्टबहादुर बिष्टको ४ वर्षीया छोरी सृष्टी घाइते भएकी हुन्। </p>
<p>विराटनगरस्थित न्युरो अस्पतालमा घाइतेको उपचार भइरहेको प्रहरीले जनाएको छ।</p>
<p>इटहरीबाट तालतलैयातर्फ जाँदै गरेको को २ च ३११४ नम्बरको गाडीले हिजो साँझ साढे ६ बजे बालिकालाई ठक्कर दिएको थियो।</p>
<p>सवारी साधनसहित चालकलाई अस्थायी प्रहरी चौकी तालतलैयाले नियन्त्रणमा लिएको छ।</p>
प्रतिक्रिया दिनुहोस्
.jpg)
