चितवनमा चाडपर्वका समयमा दुर्घटना बढी
<p>चितवन। चितवनमा चाडपर्वका समयमा दुर्घटना बढी भएको पाइएको छ।</p>
<p>दसैँ र तिहार बीचको समयमा दुर्घटनाबाट मृत्यु हुनेको सङ्ख्या धेरै भएको हो।</p>
<p>जिल्ला ट्राफिक प्रहरी कार्यालय चितवनका अनुसार चालु आर्थिक वर्षको पहिलो चार महिनामा सवारी दुर्घटनामा परी ३० जनाको मृत्यु भएको छ।</p>
<p>तीमध्ये १० जनाकाे मृत्यु कात्तिक महिनामा मात्रै भएका हुन्।</p>
<p>कात्तिकमा दसैँ र मंसीर १ गते तिहार परेको थियो। साउनमा आठ, भदौमा तीन र असोजमा ९ जनाको मृत्यु भएको छ। </p>
<p>चार महिनाको अवधिमा दुर्घटनाबाट ८६ गम्भीर र ११२ जना सामान्य घाइते भएका छन्।</p>
<p>मृत्यु हुनेमा पुरूष २५, महिला दुई, बालक एक र बालिका दुई रहेको कार्यालयले जनाएको छ।</p>
<p>कार्यालयका प्रमुख प्रहरी निरीक्षक दयाकृष्ण भट्टका अनुसार पहिलो चौमासिकमा १२१ वटा दुर्घटना भएका थिए। ती दुर्घटनामा १८३ सवारी संलग्न छन्। गत आव २०७६/७७ को पहिलो चौमासिकमा सवारी दुर्घटनाबाट ४५ जनाको मृत्यु भएको थियो।</p>
<p>सवारी दुर्घटनाको मुख्य कारण तीव्र गति रहेको भट्टले बताए। उनका अनुसार चालकको लापरबाही, उछिन्दा (ओभरटेक), यात्रुको गल्ती, खराब सडक र यान्त्रिक गड्बडीका कारण दुर्घटना हुने गरेका छन्। <em>रासस</em></p>
प्रतिक्रिया दिनुहोस्
.jpg)
