बैतडीमा बस दुर्घटना : ९ जनाको मृत्यु, ३४ घाइते
<p>बैतडी। दशरथचन्द राजमार्गअन्तर्गत बैतडीको पाटन नगरपालिका-८, खोड्पेमा बस दुर्घटना हुँदा ९ जनाको मृत्यु भएको छ।</p>
<p>दार्चुलाको गन्नाबाट महेन्द्रनगरका लागि छुटेको पवनदूत यातायातको ना ५ ख ५१४१ नम्बरको बस बिहीबार राति साढे १० बजेतिर दुर्घटनामा परेको हो। </p>
<p>सानो घुम्तीबाट बस ६०० मिटर जति तल खसेको जिल्ला प्रहरी कार्यालयका प्रमुख प्रहरी नायव उपरीक्षक नारायणप्रसाद अधिकारीले जानकारी दिए। </p>
<p>मृतकहरूको सनाखत हुन बाँकी छ। मृतकमध्ये सातजना पुरुष र दुईजना महिला छन्।</p>
<p>दुर्घटनामा परी घाइते भएका ३४ जना मध्ये गम्भीर घाइते सात जनालाई धनगढी रेफर गरिएको छ। बाँकी २७ जनाको डडेल्धुरा अस्पतालमा उपचार भइरहेको प्रनाउ अधिकारीले जानकारी दिए। </p>
<p>मृतकमध्ये आठजनाको शव घटनास्थलबाट निकालिसकिएको छ भने एकजनाको बससँगै अड्किएकाले आज दिउँसो निकालिने प्रहरीले बताएको छ।</p>
<p>प्रहरी र स्थानीयवासी मिलेर राति नै घटनास्थलबाट घाइतेहरूको उद्धार गरिएको थियो। मृतकको शव परीक्षणका लागि जिल्ला अस्पताल ल्याउँदै गरेको प्रनाउ अधिकारीले जानकारी दिए।</p>
<p>दुर्घटना कसरी भएको हो भन्नेबारेमा अझै यकिन भइनसकेको प्रहरीले जनाएको छ।</p>
<p>बस बैतडीको दोगडाकेदार–७ खोचलेकका वीरेन्द्र कार्कीको रहेको बताइएको छ। साहुु आफैँ चालक रहेका र उनीसमेत घाइते भएका छन्। <em>रासस</em></p>
प्रतिक्रिया दिनुहोस्
.jpg)
