राणा सीड सदस्यमा पुनः निर्वाचित
<p>काठमाडौं। महिलाविरुद्ध हुने भेदभाव उन्मूलनसम्बन्धी संयुक्त राष्ट्रसंघको समिति (सीड)मा बन्दना राणा पुनः निर्वाचित भएकी छन्।</p>
<p>हिजो अमेरिकाको न्यूयोर्कमा भएको निर्वाचनमा १३७ मत प्राप्त गरी राणा दोस्रो कार्यकालको लागि निर्वाचित भएकी हुन्।</p>
<p>सीड सदस्यको लागि भएको निर्वाचनमा १९ देशका उम्मेदवार थिए। मतदानमा राणाले तेस्रो बढी मत ल्याएकी थिइन्। सन् २०२१ देखि २०२४ सम्मको लागि सीडका ११ सदस्यमा उनी निर्वाचित भएकी हुन्। </p>
<p>हिजो भएको सीडको निर्वाचनमा नेदरल्याण्ड्स, बहामस, लिथुवानिया, घाना, अष्ट्रेलिया, मेक्सिको, लेबनान, फ्रान्स, फिलिपिन्स र चीनका प्रतिनिधि पनि निर्वाचित भएका छन्। </p>
<p>हाल सीडको उपाध्यक्ष रहेकी राणा उक्त संस्थामा नेपालबाट प्रतिनिधित्व गर्ने पहिलो सदस्य हुन्। राणासँग लैङ्गीक समानता तथा महिला अधिकारका क्षेत्रमा तीन दशकभन्दा बढी समय काम गरेको अनुभव छ। </p>
<p>निर्वाचनपछि न्यूयोर्कस्थित नेपाली स्थायी प्रतिनिधि अमृतबहादुर राईले राणाको जितले उनको विज्ञता र अनुभवलाई पुनः प्रमाणित गरेको बताए। </p>
<p>सीड संयुक्त राष्ट्रसंघको मानवअधिकारसम्बन्धी उच्च आयोगअन्तर्गत रहेको समिति हो। यो समिति राष्ट्रसंघको साधारणसभाले सन् १९७९ मा स्थापना गरेको थियो भने कार्यान्वयनमा १९८१ बाट आएको हो।</p>
<p>सीडमा अहिले विश्वका १८९ देश सदस्य छन्। सीडमा २३ देशका स्वतन्त्र विज्ञहरू सदस्य रहन्छन्।</p>
<p>नेपाल सन् १९९१ देखि सीडको सदस्य भएको हो। </p>
प्रतिक्रिया दिनुहोस्
.jpg)
