धनगढीमा बढ्दै छ आईपीएलको सट्टाबाजी, एकजना पक्राउ
<p>कैलाली। सुदूरपश्चिमको स्थायी राजधानी धनगढीमा पनि क्रिकेटको सट्टाबाजी बढ्दै गएको छ। </p>
<p>जारी इन्डियन प्रिमियर लिग (आईपीएल) को सट्टाबाजी बढेको भन्दै प्रहरीले सक्रियतासमेत बढाएको छ।</p>
<p>यसै क्रममा धनगढीबाट प्रहरीले एकजनालाई पक्राउ गरेको छ।</p>
<p>जिल्ला प्रहरी कार्यालय कैलालीका प्रवक्ता प्रहरी नायव उपरीक्षक प्रतिक विष्टले धनगढी उपमहानगरपालिका-३ का ३७ वर्षीय संजीव गुप्ता पक्राउ परेको बताए। </p>
<p>धनगढी चटकपुरमा प्रिति ट्रेडिङ्ग एण्ड सप्लायर्स सञ्चालन गर्दै आएका गुप्तालाई गोप्य सूचनाको आधारमा प्रहरीले पक्राउ गरेको उनले बताए। </p>
<p>गुप्ताले आईपीएलमा कुनै खेलाडी आउट भएमा, खेलाडीले रन बनाएमा, चौका-छक्का भएमा, विकेट गएमा, टिमले जितेमा वा हारेमा समेत अनलाइनमार्फत् रकम दाउमा लगाई विभिन्न व्यक्तिहरूलाई सट्टाबाजी खेल खेलाउने गरेको तथ्य फेला परेको प्रहरीले जानकारी दिएको छ। </p>
<p>प्रहरीले गुप्ताको साथबाट अनलाइनमार्फत् सट्टाबाजी गर्न गराउन प्रयोग गरेका दुई थान मोबाइलसमेत बरामद गरेको छ। </p>
<p>कैलाली जिल्ला अदालतबाट जुवा (सट्टाबाजी) मुद्दामा म्याद थप भई थप अनुसन्धान भइरहेको जिल्ला प्रहरी कार्यालय कैलालीले जनाएको छ।</p>
प्रतिक्रिया दिनुहोस्
.jpg)
