नैकापमा सवारी तोडफोड र महिलालाई हातपात गर्ने चार युवा पक्राउ
<p>काठमाडौँ। चन्द्रागिरी नगरपालिका–१४ नैकाप बाईछापस्थित सडकको किनारामा पार्किङ गरी राखेका सवारी साधनमा तोडफोड तथा एक जना महिलालाई हातपात गरी अभद्र व्यवहार गरेको अभियोगमा ४ जनालाई प्रहरीले पक्राउ गरेको छ।</p>
<p>शुक्रबार नेपाल प्रहरीद्वारा जारी विज्ञप्तिअनुसार गए राति पक्राउ पर्नेमा चन्द्रागिरि नगरपालिका–१४ नैकाप बस्ने सुनसरी घर भएका २६ वर्षीय जसराज लिम्बु, सिन्धुली मनबा घर भएका १८ वर्षीय किशोर, धादिङ निलकण्ठ नगरपालिका घर भएका २१ वर्षीय प्रवीण झेडी र काठमाडौं चन्द्रागिरी नगरपालिका–१४ नैकाप बस्ने १९ वर्षीय सबिन चापागाईँ रहेका छन्।</p>
<p>उनीहरूले एक महिलालाई विभिन्न अपशब्द प्रयोग गर्दै हातपात गरी घाइते बनाउनुका साथै पार्किङ गरी राखेका बा ८ च ५२६८, प्रदेश ३–०१–०२२ च ०८४३ नम्बरको गाडी र बा २ ज १९६५ नम्बरको ट्याक्सीमा समेत तोडफोड गरेका थिए। </p>
<p>उनीहरूले हातपात र तोडफोड गरेको भन्ने खबर प्राप्त हुनासाथ महानगरीय प्रहरी वृत्त थानकोटबाट खटिएको प्रहरीले उनीहरूलाई पक्राउ गरेको हो। तोडफोडका कारण ३ वटै सवारी साधनका सिसा फुटेर क्षति भएको छ। घटनाका सम्बन्धमा प्रहरीले थप अनुसन्धान गरिरहेको उक्त वृत्तले जनाएको छ।</p>
प्रतिक्रिया दिनुहोस्
.jpg)
