बागलुङ बाढीपहिरो: १६ जना अझै बेपत्ता
<p>बागलुङ। यो वर्षको मनसुन सुरु भएयता बाढीपहिरोमा परी बेपत्ता भएका बागलुङका १६ जनाको स्थिति अझै अज्ञात छ। </p>
<p>मनसुनजन्य विपद्का कारण ३८ जनाले ज्यान गुमाएका छन्।</p>
<p>गत भदौ १७ गते भूजीखोलामा आएको बाढीमा परेका ढोरपाटन नगरपालिका–९ का १५ जना बेपत्ता छन्।</p>
<p>त्यसअघि साउन १० गते बागलुङ नगरपालिका-१ मा खसेको पहिराेले टिपर पुर्दा हराएका चालक निर्मल पुन पनि अझैसम्म बेपत्ता छन्। </p>
<p>महिना दिन बित्न लाग्दासमेत बाढीमा परेकाहरू नभेटिएपछि प्रहरीले खोजबिन गर्न छाडेको छ।</p>
<p>सुरक्षाकर्मी र उद्धारकर्ता हप्तौंसम्म बेपत्ताको खोजीमा जुटेका थिए।</p>
<p>इलाका प्रहरी कार्यालय बुर्तिवाङका प्रहरी निरीक्षक प्रकाशसिंह भण्डारीले बेपत्ता भएका सकुशल भेटिने सम्भावना न्यून रहेको बताए।</p>
<p>सुरक्षाकर्मीले छिमेकी गुल्मीसम्म पुगेर बाढीले बगाएका शवको उद्धार गरेका थिए।</p>
<p>जिल्ला प्रशासन कार्यालय बागलुङका सूचना अधिकारी धीरेन्द्रराज पन्तले बेपत्ता भएकाका परिवारलाई पनि मृतकका परिवार सरह राहत दिलाउन प्रक्रिया अगाडि बढाइएको बताए।</p>
<p>उनका अनुसार जिल्ला विपद् व्यवस्थापन समितिको बैठकले बाढीपहिरोमा बेपत्ताको खोजबिन र स्थलगत अध्ययनका लागि जिल्ला प्रशासन कार्यालयका प्रशासकीय अधिकृत गणेश गौतमको संयोजकत्वमा उपसमिति गठन गरेको छ।</p>
<p>सरकारले मृतक परिवारलाई दुई लाख रूपैयाँ राहत प्रदान गर्दै आएको छ।</p>
<p>यस्तै एउटै परिवारमा अन्य सदस्यको पनि मृत्यु भएमा थप एक लाख रूपैयाँका दरले राहत उपलब्ध हुने गरेको छ।</p>
<p>बेपत्ता भएका परिवारलाई पनि तत्कालका लागि राहतस्वरुप १५ हजार दिने गरिएको छ। यो वर्ष बाढीपहिरोका कारण ढोरपाटनसहित जैमिनी नगरपालिका, निसीखोला, तमानखोला, ताराखोला, बडिगाड, काठेखोला गाउँपालिकालगायत क्षेत्रमा जनधनको क्षति भएको छ।</p>
<p>भूजीखोलाको बाढीमा सबैभन्दा बढी २२ जनाको मृत्यु भएको थियो। <em>रासस</em></p>
प्रतिक्रिया दिनुहोस्
.jpg)
