लागुऔषधसहित चार जना पक्राउ
<p>काठमाडौं। काठमाडौं महानगरपालिका-२६ गोंगबु शिवमन्दिर नजिकबाट नियन्त्रित लागुऔषध २५ एम्पुल डाईजेपाम, २६ एम्पुल फेनारेगन र २६ एम्पुल नुर्फिन सहित तनहुँ खैरनीटार नगरपालिका-७ घर भएका ३२ वर्षीय मनोज गुरुङलाई प्रहरीले पक्राउ गरेको छ।</p>
<p>गुरुङले लागुऔषध बेचबिखनको लागि साथमा बोकी हिँडिरहेको भन्ने खबर प्राप्त हुनासाथ महानगरीय प्रहरी प्रभाग गोंगबुबाट खटिएको प्रहरीले उनलाई उक्त लागुऔषध सहित फेला पारी पक्राउ गरेको हो।</p>
<p>कास्कीको पोखरा महानगरपालिका–९ शान्ती बनबाटिका डेरा गरी चितवन भरतपुर महानगरपालिका–९ घर भएका २८ वर्षीय दिनेश गुरुङलाई करिब ८ सय ५५ ग्राम गाँजा सहित प्रहरीले पक्राउ गरेको छ। विशेष सूचनाको आधारमा खटिएको स्थानीय प्रहरीले उनको कोठाबाट उक्त लागुऔषध फेला पारी उनलाई पक्राउ गरेको हो।</p>
<p>सप्तरीको बोदेबर्साईन नगरपालिका–९ स्थित सिमराहा बोर्डरबाट नियन्त्रित लागुऔषध २ सय ९६ पिस डाइलेक्स डिसी प्रहरीले बरामद गरेको छ।</p>
<p>प्रहरी चौकी देउरीबाट गस्तीमा खटिएको प्रहरीले खेतको आलीमा उक्त लागुऔषध फेला पारी बरामद गरेको हो।</p>
<p>दाङको तुलसीपुर उपमहानगरपालिका–६ गुम्राह चोकबाट करिब ५ किलो अवैध लागुऔषध अफिम जस्तो वस्तु सहित २ जनालाई प्रहरीले पक्राउ गरेको छ।</p>
<p>पक्राउ पर्नेहरुमा रोल्पा साबिक थवाङ गाबिस–५ बस्ने ४६ वर्षीय कर्म कुमार बुढा र उनकै श्रीमती ४६ वर्षीया राजकुमारी रोका रहेका छन्। </p>
<p>जिल्ला प्रहरी कार्यालय दाङबाट खटिएको प्रहरीले शंकास्पद रुपमा हिँडिरहेको अवस्थामा उनीहरुलाई जाँच गर्दा उक्त वस्तु फेला पारी पक्राउ गरेको हो।</p>
<p>घटनाहरुको सम्बन्धमा स्थानीय प्रहरीले थप अनुसन्धान गरिरहेको छ।</p>
प्रतिक्रिया दिनुहोस्
.jpg)
