कृषक खेतमै रातभर जाग्राम
<p>काठमाडौं। जङ्गली बँदेलले खेतमा पाक्न लागेको धानबालीमा क्षति पुर्‍याउन थालेपछि धनगढी उपमहानगरपालिका-३ का स्थानीय किसान धानबाली बचाउन रातभर खेतमै जाग्राम बस्ने गरेका छन्।</p>
<p>घर नजिकै रहेका जङ्गलबाट बँदेलले बालीमा क्षति पुर्‍याउन थालेपछि रातभर खेतमै जाग्राम बस्नुपर्ने बाध्यता भएका हुन्।</p>
<p>पाक्नै लागेको धानबाली बचाउनका लागि यहाँका कृषक रातिराति थाल बजाउने, होहल्ला गर्ने, टर्चलाइट बाल्ने, बिजुलीको तार तानेर खेतमा बत्ती बाल्ने, चौकीदारी गर्ने, भैँसीको घाटीमा लगाउने घाँडो बजाउने, खेतमै जाग्राम बस्नेलगायत क्रियाकलाप गर्ने गरेको डिलासैनी सामुदायिक वन उपभोक्ता समूहका अध्यक्ष दानबहादुर विष्टले जानकारी दिए।</p>
<p>“केही किसानले त जनावर धपाउन राति खेतमा बस्नुपर्ने भएपछि त्रिपाल टागेर छाना बनाई खेतमै सुत्ने गरेका छन्” अध्यक्ष विष्टले भने, “बँदेलले धानबाली खाने मात्र नभई भाँच्ने, कुल्चने, खन्ने गरेका कारण बढी क्षति हुने गरेको छ।”</p>
<p>ठूलो मिहिनेत र लगानीबाट वर्षभरि खान पुग्नका लागि उब्जाएको धानबाली जनावरले खाई दिनाले परिवार पाल्नसमेत अप्ठ्यारो हुने अर्का किसान कमलराज जोसीको भनाइ छ। उनले यसपालि समयमै वर्षा भएकाले धानबाली राम्रो फस्टाएको तर धानमा ठिक्क बाला लाग्ने समयमा जङ्गली बँदेलले क्षति पुर्‍याउन थालेपछि परिवार पाल्न समस्या हुने सम्भावना बढेकोमा चिन्ता व्यक्त गरे।</p>
<p>विसं २०७३ देखि नै जङ्गली जनावरले लगाएको अन्नबालीमा क्षति पुर्‍याउँदै आएको समूहका अध्यक्ष विष्टले बताए। धानबालीमा मात्रै नभई गहुँ बालीमा बँदेल, निलगाई, बाँदरलगायत जनावरले क्षति पुर्‍याउने गरेको उनको गुनासो छ।</p>
<p>वडा नं ३ का वडाध्यक्ष बलबहादुर ऐरले वडाको बजेटले सबै वनमा तारजाली लगाउन नभ्याउने भएकाले धनगढी उपमहानगरपालिका र प्रदेश सरकारलाई यसको समाधानका लागि सिफारिस पठाएको तर अहिलेसम्म कही कतैबाट कुनै सुनुवाइ नभएको गुनासो गरे।</p>
<p>रासस</p>
प्रतिक्रिया दिनुहोस्
.jpg)
