भूकम्पपीडितबाट घुस लिने प्राविधिक जागिरबाट निकाला
<p>काठमाडौं। भूकम्प पीडितबाट घुस लिएको आरोप लागेका पुन:निर्माणका प्राविधिकलाई जागीरबाट बर्खास्त गरिएको छ।</p>
<p>मोलुङ गाउँपालिका-६ श्रीचौरका लाभग्राहीबाट गैरकानूनी हिसाबले रकम लिएका पुनःनिर्माणका प्राविधिक मनोज खतिवडालाई जागिरबाट निकालिएको हो।</p>
<p>मापदण्ड विपरीत बनेका घर पास गर्नका लागि प्राविधिक खतिवडाले लाभग्राहीबाट रकम लिएका थिए। पहिलो र दोस्रो किस्ता लिइसकेका तर अन्तिम किस्ता लिन बाँकी लाभग्राहीबाट खतिवडाले १० देखि १५ हजार रूपैयाँका दरले गैरकानूनी ढंगले रकम असुलेको पाइएको समाचार आइरहेको थियो।</p>
<p>स्थानीयवासीको गुनासोसहितका समाचार सार्वजानिक भएपछि जिल्ला प्रशासन कार्यालय र जिल्ला आयोजना कार्यान्वयन एकाइ अनुदान व्यवस्थापन तथा स्थानीय पूर्वाधार कार्यालयले छानबिन थालेका थिए।</p>
<p>छानबिनका क्रममा लाभग्राहीबाट लाखौंँ रकम उठाएको प्रमाण फेला परेपछि प्राविधिक खतिवडालाई जागीरबाट बर्खास्त गरिएको जिल्ला आयोजना कार्यालयका निमित्त प्रमुख रीता लम्सालले जानकारी दिइन्।</p>
<p>लाभग्राहीबाट रकम उठाएको विषयमा अनुसन्धान गर्दा प्राविधिकले रकम उठाएको पुष्टि भएको र आरोप लागेका प्राविधिक आफैँले पनि गल्ती स्वीकारेपछि लाभग्राहीबाट लिएको रकम फिर्ता गर्ने शर्तसमेत राखेर जागीरबाट बर्खास्त गरिएको निमित्त प्रमुख लम्सालको भनाइ छ।</p>
<p>"जसको पैसा हो उसैलाई फिर्ता दिनू भनेका छौं।" निमित्त प्रमुख लम्सालले भनिन्, "जागीरबाट पनि बर्खास्त गरिसकेका छौंँ।" <br />
श्रीचौरमा खटिएका डकर्मी कर्णबहादुर तामाङ र प्राविधिक खतिवडाले भूकम्पपीडित लाभग्राहीबाट घर पास गर्न घुस रकम लिएको भन्दै लाभग्राहीले गुनासो गरेका थिए।</p>
<p>श्रीचौरका करीब ३० लाभग्राहीबाट डकर्मी तामाङ र खतिवडाले रु १० देखि १५ हजारका दरले रकम उठाएको खुलेको छ। <br />
प्राविधिक खतिवडाले स्थानीयवासीबाट रकम उठाउन पुन:निर्माणमा खटिएका डकर्मी तामाङलाई परिचालन गरेका थिए। डकर्मी तामाङलाई पनि कारवाहीको प्रक्रिया थालिएकोे जिल्ला प्रशासन कार्यालयले जनाएको छ।</p>
<p>नागरिकले खबरदारी गरेमा यस्ता गलत कार्य नहुने जनाउँदै जिल्लाका अन्य ठाउँमा पनि त्यस्तो भएको भए जानकारी गराउन जिल्ला आयोजना कार्यालयले आग्रह गरेको छ।</p>
<p>रासस</p>
प्रतिक्रिया दिनुहोस्
.jpg)
