सवारी दुर्घटनामा ६ जनाको मृत्यु
<p>काठमाडौं। कपिलवस्तु, सिरहा, धादिङ, दैलेख, सप्तरी र बझाङका छुट्टाछुट्टै स्थानमा भएका सवारी दुर्घटनामा ६ जनाको मृत्यु भएको छ।</p>
<p>कपिलवस्तुको बुद्धभूमि नगरपालिका-९ चौवन्नपुरमा लु १ च ५४४८ नम्बरको बोलेरोले लु १० प ५९२४ नम्बरको मोटरसाइकललाई ठक्कर दिँदा मोटरसाइकल चालक सोही नगरपालिका डुमरा बस्ने ४५ वर्षीय रामधनी चौधरीको मृत्यु भएको छ।</p>
<p>दुर्घटनामा गम्भीर घाइते भएका चौधरीको जिल्ला अस्पताल तौलिहवामा उपचारको क्रममा मृत्यु भएको हो। गाडी र चालकलाई प्रहरीले नियन्त्रणमा लिएको छ।</p>
<p>सिरहाको गोलबजार नगरपालिका-७ पुरानो चोहर्वामा ‘अनटेस्ट’ लेखिएको पिकअपले स.६ प ३९९३ नम्बरको मोटरसाइकललाई ठक्कर दिँदा मोटरसाइकलमा सवार सप्तरी छिन्नमस्ता गाउँपालिका-४ बस्ने ५५ वर्षीया ललितादेवी साहको मृत्यु भएको छ।</p>
<p>ठक्करबाट गम्भीर घाइते भएकी साहको उपचारको लागि भूमिजा अस्पतालतर्फ लैजाँदै गर्दा बाटोमै मृत्यु भएको हो। दुवै सवारी साधन र पिकअपका चालकलाई प्रहरीले नियन्त्रणमा लिएको छ।</p>
<p>धादिङको थाक्रे गाउँपालिका-६ महादेवबेशी बजारमा ना.३ ख ५१८३ नम्बरको ट्रकको ठक्करबाट सोही ठाउँ बस्ने ३ वर्षीया संचिता कार्कीको घटनास्थलमै मृत्यु भएको छ। ट्रक र चालकलाई प्रहरीले नियन्त्रणमा लिएको छ।</p>
<p>दैलेखको नौमुले गाउँपालिका-१ मालुभिरस्थित सडकमा ना.७ त १२१६ नम्बरको ट्याक्टर सडकबाट करिब २ सय मिटर तल खस्दा ट्याक्टरका चालक दुल्लु नगरपालिका-९ धामिगाउँ बस्ने २५ वर्षीय कविराज पुरीको घटनास्थलमै मृत्यु भएको छ।</p>
<p>सप्तरीको शम्भुनाथ नगरपालिका-८ देवधार चोकमा हाल नम्बर नखुलेको सवारी साधनको ठक्करबाट पैदलयात्री हाल पहिचान नखुलेका करिब ५० वर्षीय पुरुषको घटनास्थलमै मृत्यु भएको छ। ठक्कर दिने सवारी साधनको प्रहरीले खोजी गरिरहेको छ।</p>
<p>बझाङको बुङगल नगरपालिका-१ तल्लोदह भन्ने स्थानमा लु.१ क १२७८ नम्बरको जेसिबी सडकबाट करिब ५० मिटर तल खसेर दुर्घटना हुँदा जेसिबीमा सवार सोही नगरपालिका भिरगडा बस्ने २८ वर्षीय मान बहादुर बोहराको घटनास्थलमै मृत्यु भएको छ।</p>
<p>दुर्घटनाहरुका सम्बन्धमा स्थानीय प्रहरीले आवश्यक अनुसन्धान गरिरहेको छ।</p>
प्रतिक्रिया दिनुहोस्
.jpg)
