कञ्चनपुर: धानमा फड्के कीराको प्रकोप
<p>कञ्चनपुर। कञ्चनपुरको तीनवटा स्थानीय तहमा धानबालीमा फड्के कीराको प्रकोप देखिएको कृषि ज्ञान केन्द्र कञ्चनपुरले जनाएको छ।</p>
<p>यहाँको महाकाली, भीमदत्त र वेदकोट नगरपालिकाका केही वडामा किसानले लगाएका धानबालीमा फड्के कीराको प्रकोप देखिएको कृषि ज्ञान केन्द्रका निमित्त कार्यालय प्रमुख रामचन्द्र भट्टले बताए।</p>
<p>“हामी स्थलगत अनुगमनमा निस्केका छौँ, अन्तभन्दा महाकाली नगरपालिकामा प्रकोप बढी देखिएको छ,” उनले भने।</p>
<p>त्यहाँ अनुगमनका क्रममा डेढ बिघामा लगाएको धानबाली प्रकोपका कारण क्षति पुगेको उनले बताए। </p>
<p>“सो नगरपालिकामा १० हेक्टर धानबाली प्रभावित छ”, भट्टले भने, “अहिले किसानलाई प्रकोप नियन्त्रणका लागि विषादी दिने र प्रयोग गर्ने विधिबारे सिकाउने काम भइरहेको छ।”</p>
<p>त्यसैगरी भीमदत्त नगरपालिका-२, १८ र १९ का साथै वेदकोटका केही वडामा यसको प्रकोप देखिएको ज्ञान केन्द्रले जनाएको छ।</p>
<p>“पाक्न लागेको, पसाउन लागेकोलगायत सबै प्रकारका धानमा प्रकोप देखिएको छ”, उनले भने, “हामीले सबै पालिकाका कृषि शाखाका कर्मचारीलाई प्रकोपबारे अनुगमन गर्न भनेका छौँ।”</p>
<p>किसान भने पाक्न लागेको धानबालीमा प्रकोप देखिएपछि चिन्तित बनेका छन्। महाकाली नगरपालिकाका विष्णुदत्त भट्टले आफूले लगाएको धानबालीमा पूर्णरूपमा प्रकोप देखिएको बताए। <em>रासस</em></p>
प्रतिक्रिया दिनुहोस्
.jpg)
