पहिराेले भासियो बेँसीशहर-चामे सडक
<p>लमजुङ। हिमाली जिल्ला मनाङ जोड्ने बेँसीशहर-चामे सडक पहिराेले भासिएको छ।</p>
<p>मंगलबार रातिदेखि अविरल वर्षासँगै आएको पहिराेले आज बिहान सो सडकखण्डको बेँसीशहर नगरपालिका-६, खरखरेभिरको सडक भासिएको हो।</p>
<p>करिब २० मिटर सडक भासिएको डुम्रे-बेँसीशहर-चामे सडक योजना कार्यालयका सबइञ्जिनियर सुमन अधिकारीले बताए।</p>
<p>उनले भने, “सडकमाथिबाट आएको पहिरो र सडक तल मर्स्याङ्दी नदीले खोलेको जमिनका कारण सडक भासिँदा सडक अवरुद्ध भइरहेको छ।”</p>
<p>पानी निरन्तर परिरहेकाले तत्काल मर्मत गर्न असम्भव भएको उनको भनाइ छ।</p>
<p>सो स्थानमा लामो समयदेखि बर्सेनि हल्का वर्षा हुनासाथ ढुङ्गामाटो आएर सडक अवरुद्ध हुँदै आएको थियो।</p>
<p>सो सडकअन्तर्गत नगरपालिकै वडा नं ७ सहजीनिरको पुवाखोलामा समेत बाढी आएकाले यातायात अवरुद्ध बनाएको छ।</p>
<p>सडक अवरुद्ध हुँदा ढुवानीदेखि आकस्मिक सेवाका सबै सवारीसाधन रोकिएका छन्। <em>रासस</em></p>
प्रतिक्रिया दिनुहोस्
.jpg)
