छुट्टाछुट्टै स्थानमा भएका सवारी दुर्घटनामा पाँचजनाको मृत्यु
<p>काठमाडौं। महोत्तरी, सुर्खेत, सुनसरी, कैलाली र सिन्धुलीमा भएका छुट्टाछुट्टै सवारी दुर्घटनामा पाँचजनाको मृत्यु भएको छ।</p>
<p>महोत्तरीको गौशाला नगरपालिका–९, महरापुलस्थित सडकमा ना ८ ख ५३९५ नम्बरको टिपरको ठक्करबाट पैदलयात्री सोही ठाउँ बस्ने ४५ वर्षीया मोकिमा खातुनको मृत्यु भएको छ।</p>
<p>ठक्करबाट गम्भीर घाइते भएका उनको विराटनगर न्युरो अस्पतालमा उपचारको क्रममा मृत्यु भएको हो। टिपर र चालकलाई प्रहरीले नियन्त्रणमा लिएको छ।</p>
<p>सुर्खेतको वीरेन्द्रनगर नगरपालिका-१४ दैलेख र सुर्खेतको सिमानास्थित रातानाङ्लामा ना.४ ख ७७५५ नम्बरको ट्रक अनियन्त्रित भई सडकदेखि करिब २०० मिटर तल खसेर दुर्घटना हुँदा ट्रक चालक चितवन खैरेनी नगरपालिका-१२ बस्ने ३५ वर्षीय ईश्वर बर्तौलाको घटनास्थलमै मृत्यु भएको छ।</p>
<p>सुनसरीको दुहबी नगरपालिका-३, फुटानीचोकस्थित कोशी राजमार्गमा ज.१ च १९३२ नम्बरको एम्बुलेन्सको ठक्करबाट साइकलयात्री मोरङ सुन्दरहरैंचा नगरपालिका-१२ बस्ने ४५ वर्षीय टीकाराम श्रेष्ठको मृत्यु भएको छ।</p>
<p>ठक्करबाट गम्भीर घाइते भएका उनलाई उपचारका लागि नोबेल अस्पताल विराटनगरतर्फ लैजाने क्रममा बाटोमै मृत्यु भएको हो। एम्बुलेन्स र चालकलाई प्रहरीले नियन्त्रणमा लिएको छ।</p>
<p>कैलालीको गौरीगंगा नगरपालिका-६, कटौतीस्थित पूर्वपश्चिम राजमार्गमा ०१००८ प ६७३६ नम्बरको मोटरसाइकलको ठक्करबाट पैदलयात्री सोही ठाउँ बस्ने ६० वर्षीया कमलादेवी रोकायाको मृत्यु भएको छ।</p>
<p>ठक्करबाट गम्भीर घाइते भएकी उनको सेती प्रादेशिक अस्पतालमा उपचारको क्रममा मृत्यु भएको हो। मोटरसाइकल र चालकलाई प्रहरीले नियन्त्रणमा लिएको छ।</p>
<p>सिन्धुलीको दुधौली नगरपालिका-७ सुगारेस्थित मदन भण्डारी राजमार्गमा लु.५८ प २६३८ अस्थायी नम्बरको मोटरसाइकल र एक साइकल एकआपसमा ठक्कर खाई दुर्घटना हुँदा मोटरसाइकलमा सवार सुनसरी इटहरी घर भएका २६ वर्षीय यादव ढुङ्गानाको मृत्यु भएको छ।</p>
<p>दुर्घटनामा गम्भीर घाइते भएका उनको सिराहाको फुलकुमारी अस्पताल कर्जन्हामा उपचारको क्रममा मृत्यु भएको हो।</p>
<p>दुर्घटनामा घाइते भएका साइकलयात्री सिन्धुली दुधौली नगरपालिका-७ सुगारे बस्ने २३ वर्षीय रासलाल अधिकारीको कटारी अस्पतालमा उपचार भइरहेको छ।</p>
<p>दुर्घटनाहरूका सम्बन्धमा स्थानीय प्रहरीले आवश्यक अनुसन्धान गरिरहेको छ। </p>
प्रतिक्रिया दिनुहोस्
.jpg)
