रसियाली विपक्षी नेता नाभाल्नीको स्वास्थ्यमा सुधार, सामान्य हिँडडुल गर्न थाले
<p>बर्लिन। रसियाका विपक्षी नेता एवं रुसी राष्ट्रपति भ्लादिमिर पुटिनका कट्टर आलोचक अलेक्सी नाभाल्नीको स्वास्थ्यमा व्यापक सुधार आएको अस्पतालले जनाएको छ। </p>
<p>जर्मनीको च्यारिटी अस्पतालका चिकित्सकहरूका अनुसार नाभाल्नीलाई दिइएको कृत्रिम स्वासयन्त्र हटाइएको र उनी अस्पतालको शय्याबाट उठेर सामान्य हिँडडुल गर्न थालेका छन्। </p>
<p>फ्रान्सेली र स्वेडिस प्रयोगशालामा गरिएको परीक्षणमा नाभाल्नीलाई बेहोस बनाउने सोभियतकालीन रसायन “नोभिचोक” खानामा मिसाएर खुवाइएको पनि जर्मनीले घोषणा गरेको छ।</p>
<p>गत अगष्ट २० मा ४४ वर्षीय नाभाल्नीलाई उपचारका लागि रुसबाट जर्मनीको बर्लिनस्थित च्यारिटी अस्पताल ल्याइएको थियो।</p>
<p>जर्मनीले नोभिचोक रसायन खुवाइएका बारेमा अनुसन्धान गर्न रसियासमक्ष अनुरोध गरेको छ। रसियाले भने पश्चिमा मुलुकले रसिया विरुद्ध षडयन्त्र गर्न खोजेको आरोप लगाएको छ। </p>
<p>च्यारिटी अस्पतालले भनेको छ, “नाभाल्नीलाई स्वास फेर्नका लागि राखिएको मेकानिकल भेन्टिलेटर हटाइएको छ। छोटो अवधिका लागि उहाँ अस्पतालको शय्याबाट यताउता हिँडडुल गर्न सक्ने हुनु भएको छ।”</p>
<p>रसियाका विदेश मन्त्री सर्गेई लाभरोभले मस्को विरुद्ध नयाँ प्रतिबन्धहरु घोषणा गर्ने कुत्सित उद्देश्यबाट नाभाल्नीको मुद्दालाई पश्चिमा मुलुकहरूले अघि सारेको आरोप लगाएका छन्।</p>
<p>उनले ओम्स्कबाट मस्को फर्कनेक्रममा बिमानमै अचेत भएका नाभाल्नीलाई बचाउन विमानका पाइलटले ठूलो भूमिका निर्वाह गरेको पनि बताए। </p>
<p>उनले चिकित्सकहरूले तत्काल उपयुक्त सेवा दिन नसकेको भए नाभाल्नीको जीवन जोखिममा पनि पर्न सक्ने बताए। </p>
<p>उनले भने, “पाइलट, एम्बुलेन्सका सदस्य र चिकित्सकहरूको तत्काल प्रतिक्रिया निकै सराहनीय छ। रुसी अनुसन्धानकर्ताहरूले पनि घटनामा भरपर्दो र विश्वासिलो नतिजा ल्याउने छन्।” <em>रासस–एपी</em></p>
प्रतिक्रिया दिनुहोस्
.jpg)
