रेड पाण्डाको छालासहित ५ जना पक्राउ
<p>बाँके। दुर्लभ वन्यजन्तु रेड पाण्डा (हाब्रे) को छालासहित ५ जना बाँकेमा पक्राउ परेका छन्। बैजनाथ गाउँपालिका-१ स्थित डेनियाल रेस्टुरेन्टबाट पाँच जना पक्राउ परेका हुन्।</p>
<p>उक्त रेस्टुरेन्टमा रेड पाण्डाको छाला किनबेच भइरहेको भन्ने सूचनाका आधारमा प्रहरीले खानतलासी गरेको थियो। जहाँ देवबहादुर बाठा (सुर्खेत), गणेश बि.क. (सुर्खेत), जयबहादुर बि.क. (सुर्खेत), ईन्द्रबहादुर नेपाली (जाजरकोट) र कृष्ण वली (जाजरकोट) पक्राउ परे।</p>
<p>र, उनीहरु बस्दै आएको कोठाबाट रेड पाण्डाको नङ्ग्रा, दाँतसहितको छाला १ थान बरामद भयो। बाँके प्रहरीका अनुसार इन्द्रबहादुरले जाजरकोटकै लोकेश सिंहबाट १ लाख रुपैयाँमा किनेर कृष्ण वलीलाई दिएका थिए।</p>
<p>कृष्णबाट गणेशसम्म पुगेको छाला ४० लाख रुपैयाँमा विक्री गर्ने भनेर सुर्खेतको छिन्चुबाट बाँकेमा पुर्‍याइएको अनुसन्धानबाट खुल्न आएको प्रहरीको भनाइ छ।</p>
<p>राष्ट्रिय निकुन्ज तथा वन्यजन्तु संरक्षण ऐन २०२९ को दफा २६ (क) अनुसार यो कसूरमा १० लाख रुपैयाँसम्म जरिवाना र ५ देखि १० वर्षसम्म कैद वा दुवै सजाय हुन सक्ने कानुनी व्यवस्था छ।</p>
प्रतिक्रिया दिनुहोस्
.jpg)
