जुवाको खालबाट पक्राउ परेकाहरूलाई छुटाउन जाँदा मेयरका आफन्त र प्रहरीबीच झडप
<p>कैलाली। कञ्‍चनपुरमा जुवातास खेलेको आरोपमा पक्राउ परेकाहरू छुटाउन गएको टोली र प्रहरीबीच झडप हुँदा केही घाइते भएका छन्। </p>
<p>पुनर्वास नगरपालिकाका मेयर जीवनराम थापाका छोरा देवेन्द्र थापा, स्वकीय सचिवसमेत रहेका भतिजा टेक थापा लगायतको टोलीले इलाका प्रहरी कार्यालयमा ढुंगामुढा गर्नुका साथै प्रहरीमाथि कुटपिट गरेको प्रहरीले बताएको छ। </p>
<p>कुटपिटबाट त्यहाँ कार्यरत प्रहरी नायव निरिक्षक (सई) गोपाल बोहरा र एकजना प्रहरी हवल्दार घाइते भएका छन्। </p>
<p>तर, प्रहरीले उल्टै आफूलगायत त्यहाँ गएको टोलीलाई नियन्त्रणमा लिएर लाठी र बुटले कुटपिट गरेको टेक थापाको दाबी छ। सई बोहराले आफूलगायत देवेन्द्र थापा र अन्यलाई कुटपिट गरेको उनले बताए। </p>
<p>घटनापछि जिल्ला प्रहरी कार्यालय कञ्‍चनपुरबाट डीएसपी अमर थापा नेतृत्वको टोलि गएराति साढे ११ बजे इलाका प्रहरी कार्यालय पुगेको छ। जुवा खेलिरहेकाहरूलाई प्रहरीले नियन्त्रणमा लिएपछि एकहुल मानिसहरू हुलहुज्जत गर्दै प्रहरी कार्यालयमा ढुंगामुढा गरेपछि प्रहरीले सामान्य बल प्रयोग गरेको बताए। </p>
<p>तासजुवा खेलिरहेको अवस्थामा पुनर्वासका केही व्यक्तिहरूलाई नियन्त्रणमा लिएको विषयमा वादविवाद र कुटपिट भएको भन्दै सुदूरपश्चिम प्रदेश प्रहरी कार्यालयका निमित्त प्रमुख एसएसपी मुकेशकुमार सिंहले घटनाको छानविन गर्न निर्देशन दिइसकिएको जानकारी दिए। </p>
प्रतिक्रिया दिनुहोस्
.jpg)
