ढोरपाटन बाढी: १६ अझै बेपत्ता, खोजी जारी
<p>काठमाडाैं। ढोरपाटन नगरपालिकास्थित भूजीखोलामा यही भदौ १७ गते आएको बाढीमा परी १६ जना अझै बेपत्ता छन्।</p>
<p>बुधबारसम्ममा मृतकको सङ्ख्या २२ पुगेको छ। इलाका प्रहरी कार्यालय बुर्तिबाङका प्रहरी निरीक्षक प्रकाशसिंह भण्डारीले बेपत्ताको खोजी कार्य जारी रहेको बताए।</p>
<p>“खोलाको बहाव पनि घट्दै गएकाले अब थप सहज हुन्छ, खोजी कार्य अहिल्यै रोकिन्न”, उनले भने। खोलाको सतह घटेपछि बुधबार तीन र मङ्गलबार दुई शव फेला पार्न सकिएको उनको भनाइ छ।</p>
<p>प्रहरीले छिमेकी गुल्मी जिल्लाको बडिगाड खोलासम्म पुगेर शवको उद्धार गरेको थियो। बाढीले शव बगाएर कैयौँ किलोमिटर तलसम्म पुर्याएको प्रहरी निरीक्षक भण्डारीले बताए।</p>
<p>बाढीको घटनालगत्तै नेपाली प्रहरी, नेपाली सेना, सशस्त्र प्रहरी बल र स्थानीयवासी खोजी र उद्धारमा खटिएका थिए। ढोरपाटन नगरपालिका–९ मा खसेको पहिराले भूजीखोला थुनिँदा बाढीको रूप लिएको थियो।</p>
<p>सोही वडामा सबैभन्दा बढी जनधनको क्षति भएको छ। वडा नं. ७ र ८ पनि बाढीबाट प्रभावित छन्। प्रहरीका अनुसार बेपत्ता हुनेमा वडा नं ९ का २१ वर्षीया टेकमाया विक, १५ वर्षीय समुन्द्र विक, एक वर्षीया तिर्सना विक, १५ वर्षीया मनिषा विक, नौ वर्षीय रोशन विक, चार वर्षीय रवि विक, छ वर्षीया प्रतीक्षा विक र ३१ वर्षीय जीतबहादुर विक छन्।</p>
<p>यस्तै सोही वडाका २२ वर्षीया मनकुमारी विक, छ वर्षीया प्रकृति पुन, १० महिने शिशु उमिसा विक, ३८ वर्षीया हस्तमाया विक, ५६ वर्षीया कौशिला पुन, २१ वर्षीय विशाल पुन, आठ वर्षीय मोहन विक र ६५ वर्षीया तुलमती घर्ती बेपत्ता छन्।</p>
<p>बाढीले ८० घरमा पूर्ण र ५१ घरमा आंशिक क्षति पुर्याएको ढोरपाटन नगरपालिकाले जनाएको छ। सडक, पुल, विद्यालय, स्वास्थ्यचौकी, लघु जलविद्युत् आयोजनालगायत सयौँ भौतिक संरचनामा क्षति पुगेको छ।</p>
<p>बाढी प्रभावितको राहत र पुनःस्थापनाका लागि देशविदेशबाट स्व:स्फूर्त रूपमा सहायता जुट्ने क्रम जारी छ। सङ्घ र प्रदेश सरकारले मृतकका परिवारलाई राहत रकमसहित क्षतिग्रस्त घर पुन:निर्माणमा सघाउने भएको छ।</p>
<p>सरकारी निकायसँगै जनस्तरबाट समेत राहत सङ्कलनमा सक्रियता बढेको छ। सङ्कलित राहतलाई एकद्वार प्रणालीमार्फत बाढी प्रभावित परिवारलाई हस्तान्तरण गरिने ढोरपाटन नगरपालिकाका उपप्रमुख करमती पुनले बताए।</p>
<p>रासस</p>
प्रतिक्रिया दिनुहोस्
.jpg)
