'मेयरको घाँटी काट्छु' भन्ने पक्राउ
<p>काठमाडाैं। ललितपुरको पुल्चोकमा रथ तान्ने क्रममा प्रहरीमाथि आक्रमण गरी महानगरपालिका प्रमुखलाई आक्रमणको धम्की दिने एक जनालाई आज प्रहरीले पक्राउ गरेको छ।</p>
<p>पक्राउ पर्नेमा ललितपुर महानगरपालिका–१३ कुसुन्ती बस्ने सञ्जय शाक्य रहेको महानगरीय अपराध नियन्त्रण महाशाखाले जनाएको छ।</p>
<p>उनीमाथि यही भदौ १८ गते रातो मच्छिन्द्रनाथको रथ तान्ने क्रममा प्रहरीमाथि आक्रमण गरेको र सोही क्रममा महानगरपालिकाका प्रमुख चिरिबाबु महर्जनलाई ज्यान मार्ने धम्की दिएको आरोप छ।</p>
<p>रथ तान्ने क्रममा भएको झडपको बाहिरिएको भिडओमा उनले 'मेयरको घाँटी काट्छु' भनेको स्पष्ट सुनिएको थियो।</p>
<p>उक्त घटनापछि फरार हुँदै आएका उनलाई आफन्तकहाँ लुकिछिपी बसेका अवस्थामा आज साँझ नक्खुबाट पक्राउ गरिएको महाशाखाका प्रमुख प्रहरी वरिष्ठ उपरीक्षक दीपक थापाले जानकारी दिए।</p>
<p>उनीसँगै उक्त घटनामा संलग्न १७ जनालाई पक्राउ गरिएको बताइएको छ। अझै दुई जना फरार रहेकाले खोजी जारी रहेको जनाइएको छ।</p>
<p>निषेधाज्ञाको उल्लङ्घन गरी रथ तान्न थालेपछि प्रहरीले रोक्न खोज्दा त्यहाँ झडप भएको थियो। सोही क्रममा उनीहरुले प्रहरीमाथि नै आक्रमण गरेका थिए।</p>
<p>उनीहरुलाई अभद्र व्यवहार र सङ्क्रामक रोग ऐन २०२० अन्तरगतको मुद्दामा म्याद थप गरी अनुसन्धान भइरहेको प्रहरीले जनाएको छ।</p>
<p>रासस</p>
प्रतिक्रिया दिनुहोस्
.jpg)
