सवारी दुर्घटनामा ४ जनाको मृत्यु
<p>काठमाडौं। देशका विभिन्न स्थानमा सवारी दुर्घटनामा चार जनाको मृत्यु भएको छ। पाल्पा, सल्यान, सप्तरी र बर्दियामा भएका छुट्टाछुट्टै सवारी दुर्घटनामा उनीहरुको मृत्यु भएको प्रहरीले जनाएको छ।</p>
<p>पाल्पाको रम्भा गाउँपालिका–५ आर्यभञ्याङस्थित सडकमा ना.३ च ८८०८ नम्बरको बलेरोको ठक्करबाट पैदलयात्री सोही ठाउँ बस्ने ६० वर्षीय भुपाल सिंह रानाको मृत्यु भएको छ।</p>
<p>ठक्करबाट गम्भीर घाइते भएका उनको प्राथमिक स्वास्थ्य केन्द्र ताहुँमा उपचारको क्रममा मृत्यु भएको हो। बलेरो चालकलाई प्रहरीले नियन्त्रणमा लिएको छ। </p>
<p>सल्यानको दार्मा गाउँपालिका–२ छरीखोलास्थित सडकमा रा.१ त २५०१ नम्बरको ट्रयाक्टरबाट झर्ने क्रममा लड्न जाँदा सोही गाउँपालिका सिमलपुर बस्ने ४९ वर्षीय भद्रे खत्रीको घटनास्थलमै मृत्यु भएको छ। ट्रलीमा सवार खत्री एक्कासी बेहोस भएर लडेको बताइएको छ।</p>
<p>ट्रयाक्टर र चालकलाई प्रहरीले नियन्त्रणमा लिएको छ। </p>
<p>सप्तरीको शम्भुनाथ नगरपालिका–५ तारखाना पुलस्थित सडकमा स.१० प ५४६७ नम्बरको मोटरसाइकल अनियन्त्रित भई शनिबार राति दुर्घटना हुँदा मोटरसाइकलमा चालक सुरुङगा नगरपालिका–७ बस्ने २३ वर्षीय गाया प्रसाद चौधरीको मृत्यु भएको छ।</p>
<p>दुर्घटनामा घाइते भएका उनको युनिक अस्पताल रुपनीमा उपचारको क्रममा मृत्यु भएको हो। दुर्घटनामा गम्भीर घाइते भएका अन्य २ जनाको सोही अस्पतालमा उपचार भइरहेको छ। </p>
<p>बर्दियाको बारबर्दिया नगरपालिका–७ रम्मापुर बस्ने तुलराम थारुकी छोरी ५ वर्षीया स्मारीका थारुको ट्रयाक्टरको ट्रलीबाट खसेर मृत्यु भएको छ।</p>
<p>सोही ठाउँमा पार्किङ गरी राखेको ट्रयाक्टरको ट्रलीमा खल्ने क्रममा एक्कासी ढाला खुल्न गई स्मारीका भुईमा खस्दा उनको घटनास्थलमै मृत्यु भएको हो। </p>
<p>दुर्घटनाका सम्बन्धमा स्थानीय प्रहरीले थप अनुसन्धान गरिरहेको छ।</p>
प्रतिक्रिया दिनुहोस्
.jpg)
