सवारी दुर्घटनामा परी ६ जनाको मृत्यु
<p>काठमाडौं। देशका विभिन्न स्थानमा भएका सवारी दुर्घटनामा ६ जनाको मृत्यु भएको छ।</p>
<p>प्रहरीका अनुसार बर्दिया, महोत्तरी, नवलपरासी (पश्चिम), कपिलवस्तु र सिरहाका छुट्टाछुट्टै स्थानहरूमा भएको सवारी दुर्घटनामा उनीहरुको मृत्यु भएको हो। घटनामा एक जना घाइते भएका छन्।</p>
<p>बर्दियाको गुलरिया नगरपालिका–१२ गणेशपुरस्थित सडकमा भे.१ च १०३७ नम्बरको पिकअफ भ्यानले बुधबार साँझ साईकललाई ठक्कर दिँदा साईकलयात्री गुलरिया नगरपालिका–११ बस्ने ३५ वर्षीय अलि अहमद भाटको घटनास्थलमै मृत्यु भएको छ। पिकअप र चालकलाई प्रहरीले नियन्त्रणमा लिएको छ।</p>
<p>महोत्तरीको गौशाला नगरपालिका–२ निगोल पानी ट्याङ्कीस्थित सडकमा सोही स्थान बस्ने १४ वर्षीय बालकले चलाएको साइकलबाट खसेर साइकल पछाडी सवार २२ वर्षीया निकी मण्डलको ७ महिनाको छोरा निकियम मण्डलको बुधबार दिउँसो मृत्यु भएको छ।</p>
<p>साइकलबाट खसेर गम्भीर घाइते भएका निकियम मण्डलको प्राथमिक स्वास्थ्य केन्द्र गौशाला हुँदै प्रादेशिक अस्पताल जनकपुरमा थप उपचारको क्रममा मृत्यु भएको हो। </p>
<p>नवलपरासी (पश्चिम)को रामग्राम नगरपालिका–११ जमुवाडस्थित सडकमा ना.२ क २०९ नम्बरको ट्रकले लु.४५ प ८७४१ नम्बरको मोटरसाइकललाई बुधबार दिउँसो ठक्कर दिँदा मोटरसाइकल चालक रुपन्देही ओमसतिया गाउँपालिका–४ बस्ने २४ वर्षीय सुरेश चौधरीको घटनास्थलमै मृत्यु भएको छ।</p>
<p>ठक्करबाट घाइते भएका मोटरसाइकलमा सवार नवलपरासी पाल्हिनन्दन गाउँपालिका–४ बस्ने १९ वर्षीया प्रीति चौधरीको जिल्ला अस्पतालमा उपचार भईरहेको छ। दुबै सवारी साधन र ट्रक चालकलाई प्रहरीले नियन्त्रणमा लिएको छ। </p>
<p>कपिलवस्तुको बाणगंगा नगरपालिका–१० गलहा पुलस्थित सडकमा लु.१ ह २६४५ नम्बरको अटो रिक्सा आफै अनियन्त्रित भई बुधबार दिउँसो दुर्घटना हुँदा अटोमा सवार रुपन्देही गैडहवा गाउँपालिका–४ पौवा बस्ने ४० वर्षीय दया शंकर चामारको घटनास्थलमै मृत्यु भएको छ। </p>
<p>दुर्घटनामा घाइते भएका चालक सहित ४ जनाको स्थानीय यादव मेडिकल हल मिलनचोकमा उपचार भएकोमा २ जना उपचार पश्चात डिस्चार्ज भएका छन्। अटो र चालकलाई प्रहरीले नियन्त्रणमा लिएको छ। </p>
<p>सिरहाको सिरहा नगरपालिका–११ भलुवाहीस्थित सडकमा स.४ प ४६१० र स.४ प ७९२१ नम्बरको दुईवटा मोटरसाइकल आपसमा ठक्कर खाई बुधबार साँझ दुर्घटना हुँदा दुवै मोटरसाइकलका चालकहरूको मृत्यु भएको छ। </p>
<p>मृत्यु हुनेहरूमा स.४ प ४६१० नम्बरको मोटरसाइकल चालक सोही नगरपालिका–९ गुलरीया बस्ने ३५ वर्षीय सिल्टु ठाकुर र अर्का मोटरसाइकल चालक धनगढीमाई नगरपालिका–१० बस्ने ५१ वर्षीय दिपक कुमार पंजियार रहेका छन्। </p>
<p>ठाकुरको उपचारको लागि लहानतर्फ लैजाँदै गर्दा बाटोमै र पंजियारको जिल्ला अस्पताल सिरहामा उपचारको क्रममा मृत्यु भएको हो।</p>
<p>साथै ठाकुरको मोटरसाइकलमा सवार गुलरीया बस्ने जितेन्द्र महरा भन्ने ३५ वर्षीय शिव कुमार महराको भूमिजा अस्पताल लहानमा उपचार भईरहेको छ। दुवै मोटरसाइकललाई प्रहरीले नियन्त्रणमा लिएको छ। <br />
</p>
प्रतिक्रिया दिनुहोस्
.jpg)
