विभिन्न मुद्दाका चारजना फरार अभियुक्त पक्राउ
<p>काठमाडौं। कैलालीमा ज्यान मार्ने उद्योगका एकजना फरार अभियुक्तलाई प्रहरीले पक्राउ गरेको छ।</p>
<p>पक्राउ पर्नेमा २६ वर्षीय बलबहादुर राना रहेका छन्। </p>
<p>इलाका प्रहरी कार्यालय चौमलाबाट खटिएको प्रहरीले उनलाई गौरीगंगा नगरपालिका वडा नम्बर-२ बाट पक्राउ गरेको हो।</p>
<p>उनलाई २०७५ भदौ २१ गते जिल्ला अदालत कैलालीले ज्यान मार्ने उद्योग सम्बन्धी मुद्दामा चार वर्ष ११ महीना २ दिनको कैद सजाय सुनाएको थियो।</p>
<p>यस्तै, जिल्ला अदालत कैलालीको २०७१ पुस ३ गतेको फैसलाले जालसाजी मुद्दामा एक लाख २८ हजार १२५ रूपैयाँ जरिवाना ठहर भई फरार रहेका अभियुक्त जोशीपुर गाउँपालिका-३ बस्ने ४० वर्षीय शिवप्रसाद डगौरालाई प्रहरीले पक्राउ गरेको छ ।</p>
<p>डगौराले जग्गाको कागजातमा सोही ठाउँ बस्ने सुन्दरी दासको किर्ते सही छाप गरी नक्कली कागज तयार गरेर फरार भएका थिए।</p>
<p>इलाका प्रहरी कार्यालय जोशीपुरबाट खटिएको प्रहरीले खोजी गर्ने क्रममा उनलाई आफ्नै घरमा फेला पारी पक्राउ गरेको हो ।</p>
<p>गौरालाई आवश्यक कारबाहीको लागि जिल्ला अदालत कैलालीमा पेश गरिएको कैलाली प्रहरीले जनाएको छ।</p>
<p>यसैबीच जिल्ला अदालत कैलालीको २०७१ जेठ २५ गतेको फैसलाले चोरी मुद्दामा एक लाख १७ हजार पाँच रूपैयाँ जरिवाना ठहर भई फरार रहेका दुईजना अभियुक्तलाई प्रहरीले पक्राउ गरेको छ।</p>
<p>पक्राउ पर्नेहरूमा कैलारी गाउँपालिका-८ बस्ने ३२ वर्षीय पप्पु चौधरी र सोही ठाउँ बस्ने २९ वर्षीय नरेश चौधरी रहेका छन्।</p>
<p>इलाका प्रहरी कार्यालय मसुरियाबाट खटिएको प्रहरीले उनीहरूलाई आ-आफ्नै घरमा फेला पारी पक्राउ गरेको हो।</p>
<p>पक्राउ परेका दुवैजना कारागार चलान भएका छन्।</p>
प्रतिक्रिया दिनुहोस्
.jpg)
