सिन्धुपाल्चोकको लिदीका पहिरो पीडितहरूलाई राप्रपाको पाँच लाख ६ हजार राहत
<p>काठमाडौं। राष्ट्रिय प्रजातन्त्र पार्टी (राप्रपा) ले सिन्धुपाल्चोकको जुगल गाउँपालिका-२, लिदीका पहिरो पीडितहरूलाई बिहीबार राहत वितरण गरेको छ।</p>
<p>जुगल गाउँपालिका, सेलाङमा सम्पन्न एक समारोहबीच प्राकृतिक प्रकोपको क्रममा मृत्युवरण गरेका १२ परिवारलाई प्रति परिवार बाह्र हजार रूपैयाँ उपलब्ध गराएको छ।</p>
<p>सो अवसरमा पूर्ण रूपमा घरबारीमा क्षति भएका १८ परिवारलाई जनही ६ हजार रूपैयाँ र विस्थापित १२७ घरधुरीलाई प्रति परिवार दुई हजार रूपैयाँको दरले राप्रपाले राहत उपलब्ध गराएको छ।</p>
<p>समारोहमा कूल पाँच लाख ६ हजार रूपैयाँ हस्तान्तरण गरिएको थियो। उक्त अवसरमा जारी गरिएको सन्देशमा राप्रपाका अध्यक्ष पशुपतिशमशेर जबराले बाढी पहिरोबाट ठूलो जनधनको क्षति भएकोमा दुःख व्यक्त गर्दै स्थानीय जनताको पिरमर्कामा सदा साथ रहने बताए।</p>
<p>राप्रपाका अध्यक्ष, जिल्लाका विभिन्न तहमा क्रियाशील नेताहरूको अग्रसरता र सहयोगमा लिदीका पहिरो पीडितहरूलाई राहत रकम उपलब्ध गराइएको हो।</p>
<p>राप्रपाका केन्द्रीय सदस्यहरू रमेश लामा र उदय सापकोटा, राप्रपा निकट महिला संगठनका केन्द्रीय महासचिव कुमारी तामाङ, जिल्ला अध्यक्ष गोपाल श्रेष्ठ, जिल्ला सदस्य नारायण पाण्डे, क्षेत्रीय अध्यक्ष शिव भण्डारीलगायत जिल्ला र क्षेत्रका पदाधिकारीहरूको उपस्थितिमा राहत वितरण गरिएको थियो।</p>
<p>अविरल वर्षाको कारण सिन्धुपाल्चोक जिल्लाका विभिन्न भागमा बाढी पहिरोका कारण ठूलो जनधनको क्षति भएको छ।</p>
प्रतिक्रिया दिनुहोस्
.jpg)
