डेढ महिनादेखि दार्चुला-तिङ्कर सडक अवरुद्ध
<p>दार्चुला। निर्माणाधीन दार्चुला–तिङ्कर सडक खण्डको ट्रयाक खुलेको ४० किलोमिटर सडकखण्ड डेढ महिनादेखि अवरुद्ध भएको छ।</p>
<p>१२ वर्ष अघिबाट निर्माण शुरु भएको सो सडकखण्डको खलङ्गादेखि व्यास गाउँपालिकाको सुनसेरा तुसरपानीसम्म सडकको ट्र्याक खुलेको थियो तर बर्खा शुरु भएसँगै यो क्षेत्रको सडक पूर्ण रुपमा अवरुद्ध भएको हो।</p>
<p>खलङ्गादेखि दुहुँको हिकिलासम्म मात्रै झण्डै आधा दर्जन ठाउँमा सडक अवरुद्ध भएको छ। हिकिलादेखि सुनसेरासम्म पनि सोही मात्रामा सडक अवरुद्ध भएको छ।</p>
<p>तत्काललाई दुहुँ गाउँपालिकाको हिकिलासम्म सडक पुन: सञ्चालन गर्न पनि निकै सास्ती छ।</p>
<p>“निर्माणाधीन सडक अवरुद्ध भएसँगै दुहुँ र व्यासको जनजीवन अस्तव्यस्त बनेको छ”, दुहुँ गाउँपालिका-५ का जयदेव महराले भने, “पैदल हिँड्न पनि बाटो अप्ठ्यारो छ। ठाउँठाउँमा पहिरो गएको छ। ढुङ्गा खस्ने डर उत्तिकै छ।” व्यासदेखि खलङ्गा पुग्न झन् कष्टकर छ। </p>
<p>विगतमा भारतीय बाटो हुँदै सदरमुकामसम्म आवतजावत हुने गथ्र्यो तर यो पटक गत चैत ११ गतेदेखि लकडाउन शुरु भयो । नेपाल भारत नाका यही भदौ मसान्तसम्मका लागि सरकारले बन्द गराएको छ।</p>
<p>दार्चुला–तिङ्कर सडक योजनाले अवरुद्ध सडक खुलाउन शुरु भएको जनाएको छ। योजनाका इन्जिनीयर दिनेश रैखोलाले भने, “व्यास र दुहुँमा खाद्यान्न लगायतका सामग्रीको अभाव भयो भनेर भनेको भन्यैछन्।”</p>
<p>तिमुरपाटामा मात्रै २० मिटर बढी पर्खाल लगाउनुपर्ने छ। अहिले कार्यालयले नै स्थानीयवासीलाई काममा लगाएर जाली भराउने काम शुरु गराएको उनले जनाए। हिकिलासम्मको ६/७ ठाउँमा सडक बिग्रिएको छ।</p>
<p>तिमुरपाटामा सडक खुलाउन सके अन्य क्षेत्रमा मेसिन लिन सकिन्छ। मेसिन पठाउन सकियो भने दुई साताभित्र ट्र्याक्टर गुड्ने गरी सडक खुलाउने प्रयास भइरहेको इन्जिनीयर रैखोला बताउँछन्।</p>
<p>खलङ्गा खार गोकुलेश्वर सडक पनि एक महिनादेखि अवरुद्ध छ। गत साउन ५ गते आएको बाढी पहिराका कारण यो सडकखण्ड अवरुद्ध छ।</p>
<p>जिल्ला सदरमुकाम खलङ्गा नजीकै रहेको धौलिगाडमा सडक मर्मत गरी एक महिनापछि सडक पुन: सञ्चालन गरिएको छ। गत साउन ४ गते राति आएको अविरल वर्षाका कारण धौलिगाडले सडकमा क्षति पुर्‍याएपछि सो सडक अवरुद्ध भएको थियो।</p>
<p>सडक डिभिजन कार्यालय बैतडी पाटनले अस्थायी रुपमा सडक खुलाउने काम गरेको सहायक प्रमुख जिल्ला अधिकारी टेकसिंह कुँवरले बताए।</p>
<p>अहिले पनि पर्खाल लगाउने काम चलिरहेको छ । सोही ठाउँमा निर्माणाधीन पुल अधुरै रहँदा बाढीले सडक बगाएको हो। मुआब्जा विवादका कारण ५ वर्षदेखि सो क्षेत्रमा पुल निर्माण हुन सकेको छैन।</p>
<p>रासस/नरेन्द्रसिह कार्की</p>
प्रतिक्रिया दिनुहोस्
.jpg)
