Others

गृहपृष्ठ

पत्रकारमा महामारीको असर : गम्भीर मनोवैज्ञानिक र आर्थिक समस्या काठमाडौं। विश्वव्यापीरूपमा फैलिएको कोरोना भाइरस महामारीको गम्भीर असर नेपालको पत्रकारिता क्षेत्रमा परेको एक सर्वेक्षणले देखाएको छ। नेपाल प्रेस इन्स्टिच्युट र बेलायतको बर्नमाउथ विश्व विद्यालयले संयुक्तरूपमा सञ्चालन गरेको राष्ट्रिय सर्वेक्षणमा कोरोना महामारीका कारण नेपालमा पत्रकारहरूलाई मनोवैज्ञानिक र आर्थिकरूपमा गम्भीर असर पारेको तथा सञ्चारमाध्यमका सामग्रीको उत्पादनसमेत घटेको देखिएको छ। काठमाडौंबाट आज भर्चुअल समारोहको माध्यमबाट अर्थ र सञ्चार तथा सूचना प्रविधि मन्त्री डा. युवराज खतिवडाले सार्वजनिक गरेको सर्वेक्षण प्रतिवेदनमा अधिकांश पत्रकारको मानसिक स्वास्थ्यमा असर पुर्&zwj;याएको देखाएको छ। प्रतिवेदन सार्वजनिक गर्दै मन्त्री डा. खतिवडाले पत्रकारहरूलाई आर्थिक कठिनाइ परेको कुरा तथ्यगतरूपमा देखाएको बताउँदै सरकारले समाचार संस्थाहरूसँग छलफल गरी कोरोना राहत कोषबाट पत्रकारहरूलाई सहयोग गर्न सकिने बताए। समाजलाई प्रेरणा दिने पत्रकारहरू नै जोखिम, चिन्ता र चरम निराशामा पर्नु दुःखलाग्दो विषय भएको उल्लेख गर्दै उनले पत्रकारहरूलाई बीमा र अन्य भौतिक सुरक्षा प्रदान गर्ने दायित्व सम्बन्धित सञ्चारमाध्यमको पनि भएको र यसका लागि सहयोग गर्न सरकार तयार रहेको प्रतिबद्धता जनाए। त्यसैगरी नेपाल पत्रकार महासंघका अध्यक्ष गोविन्द आचार्यले पत्रकार महासंघले पनि महामारीले पत्रकारमा परेको प्रभावबारे अनुसन्धान गर्न लागेको बताउँदै आज सार्वजनिक प्रतिवेदनले आगामी खोज अनुसन्धानलाई आधार सिर्जना गरेको उल्लेख गरे।  गएको असार २६ देखि साउन ९ गतेसम्म सातवटै प्रदेशबाट सबै खालका सञ्चारमाध्यमको प्रतिनिधित्व हुने गरी एक हजार १३४ जना क्रियाशील पत्रकारका बीचमा सर्वेक्षण गरिएको थियो। <img alt="" class="align-left" height="424" src="/uploads/editor/2020-08-19/153714344Nepal Report02 01Aug20201.jpg" width="300" />सर्वेक्षणमा सहभागी ८३ प्रतिशत पत्रकारले जोखिमको अनुभूतिमा वृद्धि भएको, ७५ प्रतिशत पत्रकारहरूले चिन्ता बढेको र ६२ प्रतिशत पत्रकारहरूले आफूहरू दुःखमा परेको प्रतिक्रिया दिएका थिए। २५ प्रतिशत पत्रकारले आफूहरू चरम निराशाबाट ग्रसित रहेको समेत उल्लेख गरेका छन्। त्यस्तै पत्रकारहरू चरम आर्थिक मारमा परेको सर्वेक्षणको नतिजाले देखाएको छ। सर्वेक्षणमा सहभागी ७४ प्रतिशत पत्रकारहरू आर्थिकरूपमा प्रभावित भएका छन्। जसमध्ये ३८ प्रतिशतले पारिश्रमिक कटौतीमा परेको बताएका छन्। महामारीका कारण केही प्रकाशनहरू डिजिटल माध्यममा मात्र सीमित भएका छन्। छापा माध्यममा कार्यरत ५५ प्रतिशत उत्तरदाताले आफू कार्यरत छापा माध्यमको पृष्ठ घटेको बताएका छन् भने ४८.४ प्रतिशत (२२७ जना) ले छापा माध्यमको प्रकाशनको समय (फ्रीक्वेन्सी) घटेको उल्लेख गरेका छन्। रेडियोमा कार्यरत ५१.८ प्रतिशत (१७६ जना) उत्तरदाता र टेलिभिजनमा कार्यरत ४२.८ प्रतिशत (११६) उत्तरदाताले प्रसारण सामग्रीको उत्पादन घटेको बताएका छन्। सर्वेक्षणमा विपत&zwj;्सँग जुध्ने पत्रकारहरूको क्षमतालाई स्वमूल्यांकनको आधारमा नेट प्रोमोटर स्केल विधिबाट मापन गरिएको थियो। जसले पत्रकारहरूमा विपतको तयारी कमजोर रहेको देखाएको छ। पत्रकारहरूलाई तालिमलगायतका क्षमता विकासमा स्रोतसाधनको लगानी आवश्यक रहेको समेत प्रतिवेदनमा औँल्याइएको छ। त्यसबाहेक विपत&zwj;्को समयमा पत्रकारिता क्षेत्रको क्रियाशीलताका लागि सरोकारवालाहरूको लागि विभिन्न सिफारिससमेत सर्वेक्षण प्रतिवेदनमा गरिएको नेपाल प्रेस इन्स्टिच्युटका अध्यक्ष नीलकण्ठ उप्रेतीले जनाएका छन्।

प्रतिक्रिया दिनुहोस्