गोंगबु हत्या प्रकरणः एक महिला पक्राउ, चितवनबाट काठमाडौं ल्याइँदै
<p>काठमाडौं। गो‌ंगबु हत्या प्रकरणमा एक महिलालाई प्रहरीले पक्राउ गरेको छ।</p>
<p>चितवनको माडीबाट कल्पना शाही नाम गरेकी महिलालाई पक्राउ गरेर काठमाडौं ल्याउन लागिएको प्रहरीले जनाएको छ।</p>
<p>चितवन प्रहरीको सहयोगमा महानगरीय अपराध महाशाखाले पक्राउ गरेर काठमाडौं ल्याउन लागिएको महाशाखा प्रवक्ता ईश्वर कार्कीले जानकारी दिए।</p>
<p>मृतकको टेलिफोनमा भएको कुराकानी आधारमा ती महिलासँग कुराकानी गरेको देखिएको भन्दै सोधपुछका लागि काठमाडौं ल्याउन लागिएको प्रवक्ता कार्कीले बताए।</p>
<p>गोंगबुको गणेश मन्दिरदेखि भित्र पर्ने नवज्योति मार्गमा हिजो बिहान कृष्णबहादुर बोहराको शव फेला परेको थियो। टाउको र खुट्टा जेब्राको झोलामा र शरीर सुट्केसमा भएको अवस्थामा फेला परेका बोहराको आज मात्र पहिचान खुलेको थियो। </p>
<p>मृतक र ती महिला गोंगबुस्थित एउटै फल्याटमा बस्दै आएका थिए। काठमाडौं प्रहरी प्रमुख एसएसपी श्याम ज्ञवालीले घटनाबारे प्रहरीका विभिन्न निकाय मिलेर अनुसन्धान भइरहेको बताए।</p>
<p>हत्या के कति कारणले गरिएको भन्नेबारे अझै खुल्न नसकेको भन्दै एसएसपी ज्ञवालीले भने, “यो घटनालाई सुरक्षा निकायले निकै महत्त्व दिएर अनुसन्धान गरिरहेको छ। केही दिनमै घटनाको सत्यतथ्य पत्ता लाग्नेछ।”</p>
प्रतिक्रिया दिनुहोस्
.jpg)
