जापानमा कोरोना सङ्क्रमण बढ्दो, अनावश्यक भेटघाट गर्न निरुत्साहन
<p>काठमाडौं। गर्मी विदा सुरु हुँदै गर्दा जापानमा कोरोना सङ्क्रमितको सङ्ख्या वृद्धि भइरहेको जापानी अधिकारीले बताएका छन्।</p>
<p>‘बोन फेस्टिवल’को मौसम आएको भए पनि कोरोना भाइरस सङ्क्रमितको सङ्ख्या बढेसँगै गृहनगरहरूमा प्रान्तका राज्यपालहरूले मानिसलाई अनावश्यक भेटघाट गर्न निरुत्साहित गरेका छन्। </p>
<p>जापानमा पछिल्लो २४ घण्टामा कोरोना भाइरसबाट सङ्क्रमित भएकाको सङ्ख्या एक हजार ५६५ पुगेको छ। जापानमा हालसम्म सङ्क्रमित भएकाको कूल सङ्ख्या ४७ हजार ४६४ पुगेको छ।</p>
<p> जापानको तथ्याङ्कमा डायमण्ड प्रिन्सेस नामक पानीजहाजबाट जापान आएका ७१२ सङ्क्रमितलाई समावेश गरिएको छैन। उक्त जहाज टोकियोको नजिकको बन्दरगाह शहर योकोहामामा क्वारन्टिनमा बस्ने क्रममा सङ्क्रमित भेटिएका थिए।</p>
<p>जापानमा कोरोनाभाइरस सङ्क्रमणबाट मर्नेहरूको सङ्ख्या अहिले एक हजार ५० पुगेको छ। मृतकमध्ये १३ जना डायमण्ड प्रिन्सेस जहाजका यात्रु थिए।</p>
<p>मन्त्रालयका अनुसार जापानमा कूल १४० सङ्क्रमितमा जटिल समस्या देखिएको छ। र, उनीहरूलाई भेन्टिलेटर तथा सघन उपचार कक्षमा राखी उपचार भइरहेको बताइएको छ।</p>
<p>शनिबार टोकियोमा सबैभन्दा बढी थप ४२९ जनामा सङ्क्रमण पुष्टि भएको छ।</p>
प्रतिक्रिया दिनुहोस्
.jpg)
